Ачлгдсн өрк-бүлмүдиг йөрәв

Хальмг Таңһчин Толһач Хаска Бату «Эк-эцкин туурмҗ» гидг орденә медаляр ачлгдсн хальмг
өрк-бүлмүдиг йөрәһәд, байринь хувалцв.
- Әрәсән Президент Владимир Путинә зәрлгәр Хальмг Таңһчас хойр өрк-бүл «Эк-эцкин туурмҗ» гидг орденә медаляр ачлгдв. Өрк-бүлин чинр батллһнд тәвцән орулсн болн дөрвнәс үлү үр асрсн олн үртә эк-эцкнрин ач-тус темдглҗ, эн өөдән ачлвр бәрүлҗ өггднә. Мингиян Юрьевич болн Вера Владимировна Бовалдыковихн арвн тавн җилдән хамдан бәәнә, эдн зурһан үрән өскәд, чик сурһмҗ өгв. Утнасн Михайлович болн Деля Васильевна Дорджиевихн болхла, хөрн җил хооран өрк-бүлән өндәлһәд, тавн үртә болв. Өөдән ачлврар темдглгдсн нег һазра улсиг цаһан седкләсн йөрәҗәнәв. Бат өрк-бүл тогтаҗ, үрдтән дуран болн килмҗән өгсндтн ханлтан өргҗәнәв, – гиҗ Бату Сергеевич йөрәлин үгдән темдглв.
Хальмг Таңһчд сүл тавн җилин эргцд олн үртә өрк-бүлмүдин то 28 процентд өсв гиҗ Хаска Бату темдгләд, тедниг дөнңлһнә немр керг-үүлдврмүд батлгдсинь зәңглв. Тиигәд, олн үртә өрк-бүлмүдт коммунальн туслмҗин һару даңцагдна, сурһульч болһнд халун хотар тетклһнд болн сурһулин кемд белдлһнд демин мөңгн өггднә, дунд шишлң сурһуль-эрдмин бүрдәцст сурдг оютнрт бас сурһульд һарһсн мөңгнә һару бас даңцагдна.
- Әрәсән Президент өрк-бүлин җил зарлсмн, тегәд иим керг-үүлдврмүд онц чинртә болна. Олн үр өскчәхнь ода сән авъяст тохрҗахиг бидн үзҗәнәвидн. Ик кезәнәс авн хальмг улс өнр-өсклң болҗ, олн үртә бәәсмн. Үрн дала болхла, өрк-бүл бат болн чаңһ болдг гиҗ тоолгдна. Хальмгт олн үртә өрк-бүлмүдин то өсхин төлә цугинь кехвидн, – гиҗ таңһчин Толһач темдглв.
БАТАН Наталья