Ик наста аавиг йөрәв

Шидр Төрскән харсгч Алдр дәәнә ветеран Иван Митрофанович Гончаров 95 насна өөнән темдглв. Медәт Троицкое селәнд бәәнә. Әрәсән Президент Владимир Путин илгәсн йөрәлин бичгиг Хальмг Таңһчин социальн делгрлтин, күч-көлснә болн көдлмшәр тетклһнә министрин дарук Һәрән Ольга ветеранд бәрүлҗ өгәд, бат эрүл-менд болн хөв-кишг дурдв. Целинн района муниципальн бүрдәцин һарвдр ветераниг бас йөрәһәд, белг бәрүлҗ өгв.

Иван Митрофанович 1929 җилд һарсмн, эн насн-җирһлиннь туршарт Троицкое селәнд бәәнә. Эднә өрк-бүл эн селә бүрдәсн улс болна. Төрскән харсгч Алдр дәәнә цагт Иван бөдүн улсла зерглҗ көдләд, олна малд өвс белдлһнд, мал хәрүллһнд тәвцән орулсмн. Баһ цагтан эн колхозд түрүләд модна урч, хөөннь механизатор болҗ көдлҗ йовла. Района, таңһчин болн орн-нутгин делгрлтд ик тәвцән орулҗ, үнн-чик седклтәһәр олн җилдән көдлсн төләдән Иван Гончаров «Төрскән харсгч Алдр дәәнә цагт күцәмҗтәһәр көдлсн төлә» болн «Күч-көлснә ветеран» медальмүдәр ачлгдсмн. 2015 җилд бәәрн әмтнә болн района депутатнрин седвәрәр Иван Митрофанович «Целинн района күндтә иргн» гидг цол зүүв.
Лидия Николаевна авальтаһан эдн дөрвн көвү өскәд, чик сурһмҗ өгв. Өнр-өсклң Гончаровихн селәндән тоомсрта, күндтә өрк-бүл гиҗ тоолгдна. Эднә өрк-бүлд 13 ач, 30 җич бәәнә. Күндтә аав олн ачнриннь кишгт багтҗ, җирһлиннь байн дамшлтарн эднлә хувалцҗ, чик авг-бәрцәрн бахмҗ үүдәнә. Иван Митрофанович зөвәр наста болв чигн өдр болһн йовһар йовна, цогц-махмудан батрулҗ, чик авг-бәрцәр бәәнә. Эн өдр болһн скутерәр селәнә уульнцсар йовна. Тер төләд эн бат, чаңһ-чиирг, заглюн бәәнә. Эн цаһан седклтә, әмтнлә ээлтә, сәәхн заңта медәт болна.
- Би төрскн һазр-усндан дуртав, шин өдр эклснд байрлҗ, бәәсәрн байн бәәнәв. Му санан угав, зуг байрта зәңг соңснав, сән улсла харһнав. Әмтнлә ниитә бәәнәв, көвүдиннь болн олн ачнриннь күцәмҗд байрлҗ, эднә җирһл хөвтә болтха гиҗ зальврнав. Би наснаннь туршарт төрскн селәндән күндтә болн дурта улс дунд бәәнәв, эннь нанд чидл-омг өгнә, - гиҗ Иван Митрофанович келнә.
Ветеран ирсн гиичнрлә күүндәд, ончта өөнләнь йөрәснднь ханлтан өргв. Иван Гончаровин җирһлин хаалһ олнд бахмҗ үүдәнә, эн нег һазра улст үлгүр-үзмҗ болна гиҗ гиичнр темдгләд, зу нас наслҗ эрүл-менд бәәхиг дурдв.

БАТАН Наталья
ЗУРГТ: Төрскән харсгч Алдр дәәнә ветеран Иван Гончаров
гиичнртәһән