Салдсин эцкиг ачлв

Көтчнрә гимназьд иргчдән Төрскән харсачнрин зергләнд орҗ цергт мордҗах көвүдин төлә байрин керг-үүлдвр болв. Эн өдр районас нәәмн көвүн цергт мордв. Эдниг Көтчнрә района толһачин негдгч дарук Давинә Очр, Целинн болн Көтчнрә райодын цергә комиссар Бован Эрднь, Хальмг Таңһчин Улсин Хуралын (Парламентин) депутат Мацга Татьяна болн социальн зүүцүләч Һооҗура Александра йөрәһәд, сәәнәр цергләд, эк-эцкиннь нериг өөдән бәрхиг дурдв.

Харһлтд Көтчнрә района бәәрн күн Бадмһәрән Саврт «Салдсин эцк» гидг олна күндллһнә медаль бәрүлҗ өггдв. Төрскнәннь зөрмг харсачнриг өсксн эцк эн өөдән ачлврар ачлгдснь олнд бахмҗта йовдл болв. Савр Николаевич Виктория Гавриловна авальтаһан һурвн көвү өскв, чик сурһмҗ өгв. Эднә Нарма болн Санчр көвүд цергә шишлң керг-үүлдвр эклсн түрүн өдрәс авн орлцад, өвкнриннь авъясар төрскн һазр- усан харсхин төлә зөрмгән үзүлв. Нарма цергә даалһвран күцәҗ йовад, әмнәсн хаһцв. Эн Залу-зөрмгин орденәр ачлгдсмн. Санчр дүнь цергә ик сурһуль төгсәснә хөөн дамшлтта офицер болв. Савр Николаевич көвүдтән үлгүр-үзмҗ болҗ, ик дааврта болн үнн-чик хәләцтә күн гиҗ тоолгдна. Эн эрдмәрн инженер болна, тегәд Луганск Улсин Республикд көдлмшин халхар йовад, бәәрн улсин җирһлин таал ясрулхар дөрвн сардан тенд көдлв.
«Салдсин эцк» гидг ачлвр олн-әмтнә күндллһнә темдг болна. Әрәсән әмтн эк-эцкин зөрмгин үниг өөдәнәр үнлҗәхиг эн ачлвр медүлҗәнә.

ДООҖАН Наталья
ЗУРГТ: Көтчнрә РМО-н толһачин дарук Давинә Очр «Салдсин эцк» гидг медаляр Бадмһәрән Савриг ачлв