Антрацит балһсна бичкдүдиг эмнүлҗәнә

Хальмг Таңһч болн Луганск Улсин Республикин Антрацитовск район хоорнд батлгдсн нөкцлтин медлд социальн бүрдәцс бат залһлда бәрҗ, иньгллтин хәрлцә делгрүлҗәнә. Мана таңһчин болн Антрацитын әмтнә социальн теткврин хамцу төвмүд ниитәһәр үүлдҗ, җирһлин күнд таалд туссн улст дөңгән күрглһнә туст дамшлтарн хувалцҗана. Давсн долан хонгт Антрацитас эрмдгтә бичкдүд таңһчд ирәд, гемтә-шалтгта бичкдүдин реабилитацин төвд эмнлһ авчана.

Таңһчин төвин көдләчнр гиичнриг байртаһар тосад, «Эк болн үрн» әңгд бәәхин төлә сән таал тогтав. Эмчнр эрмдгтә күүкдин эрүл-мендин бәәдл шинҗләд, эмнлһнә болн реабилитацин керг-үүлдврмүд батлв. Эдн эмнлһ авсн деерән Элстиг һәәхҗ, хальмг улсин сойлла болн тууҗла таньлдҗ, цаган сергмҗтәһәр давулхин төлә соньн көтлвр белдгдв. Келхд, бичкдүд экнртәһән ирв, тегәд күүкд улст бас онц оньг өггдхмн, гертән олн зүсн эв-арһ олзлҗ үрдтән дөң күргҗ чадхиг эднд дасххмн.
- Мана төвд Антрацит балһсна бичкдүд эмнлһ авчахнь маднд ик дааврта болҗана. Эмчнр күүкдин эрүл-мендин бәәдл шинҗләд, кенд ямаран эмнлһн кергтәһинь диглҗ авв. Эднд физиотерапевтическ эмнлһн кегдҗәнә, тер мет бичкдүдин кел өргҗүллһнә төлә мана төвин мергҗлтнр болн багшнр соньн кичәлмүд давулҗана. Дәкәд күүкдин билг-эрдм делгрүхин төлә зурлһна болн юм уйлһна мастерскойд кичәлмүд бас болна. Давсн долан хонгт гиичнр Хальмг төв хурлд одад, шар шаҗна тууҗла таньлдв. Хальмг Таңһчд ирснь эднд соньн зуульчллһн болв, тегәд мана гиичнр энд эрүл-мендән батрулад сергмҗтәһәр амрхин төлә бидн килмҗән тусхаҗ, байртаһар тосвидн. Бичкдүд экнртәһән Элстд хойр долан хонгтан бәәхмн, - гиҗ эн төвин һардач Балдашина Анна келв.
Антрацит балһснас ирсн уйн наста гиичнриг таңһчин бичкдүдин эмнлһнә эмчнр бас хәләһәд, дөңгән күргҗәнә. Тиигәд, эмчнр кесн шинҗллтин хөөн хойр күүкн эмнлһнд орулгдв. Негнь гүлгн гемтә, тегәд терүнд эмнлһ кехин төлә шаңһа эмнлһнә мергҗлтнрлә телеүзлин эв-арһар селвлцән болв. Эмнлһнд бәәдг бичкдүдин эрүл-мендин гүн шинҗллт кегдәд, эрүл-мендин бәәдлинь батрулхмн.
Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Маринан темдглсәр, Антрацит балһснас ирсн бичкдүдт болн экнрт килмҗ тусхагдҗ, кергтә эмнлһн болн дөң күргхмн. Эдн хойр долан хонгин эргцд мана таңһчд бәәһәд, цуг халхар туслмҗ авхмн. Мана таңһч болн ЛНР-ин Антрацитовск район хоорнд батлгдсн нөкцлтин медлд гемтә-шалтгта бичкдүдин түрүн баг ирснь тер. Хөөннь талдан бичкдүд бас ирхмн гиҗ күләгдҗәнә. Таңһчин социальн бүрдәцс Антрацитовск района медәтнрт, баһ тетквртә болн олн үртә өрк-бүлмүдт, көдлмш уга әмтнд социальн дөң күрглһнә халхар цааранднь чигн дөңгән күргҗ, эднә җирһлин таал ясруллһна керг-үүлдврмүд күцәхмн.

ДООҖАН Наталья