Манахс Әрәсән марһанд диилвр бәрв

Шидр Москва балһснд Кремлевск Бәәшңд «Җилин сән гисн өрк-бүл» Әрәсән марһанд дииләчнриг ачллһна байрин хург болв. Мана орн-нутгин олн үртә, селән һазрт бәәдг, өвкнриннь авъяс хадһлдг, баахн болн тәвн һар җилдән хамдан бәәдг сән гисн өрк-бүлмүд тавн багар ачлгдв. Эдн эврәннь бәәдл-җирһлин болн күцәмҗин тускар олнд медүлҗ, хоорндан бат залһлда батрулҗ, орн-нутгин хотл балһснд сергмҗтәһәр амрад ирв. Эн җил марһанд 11 миңһн өрк-бүл орлцв, теднәснь 388 өрк региональн девсңд ончрад, ашлгч дөрлдәнд орлцх зөв авсмн. Марһана ашар 88 өрк-бүл «Җилин сән гисн өрк-бүл» Әрәсән марһана дииләчнр болв. Хальмг Таңһчас Олег Владимирович болн Цаган Анджаевна Цереновихн «Авъяс хадһлдг өрк-бүл» гидг багд диилвр бәрв.

- Хулһн сарин 16-ас авн 20 күртл бидн өрк-бүләрн Москвад талдан дииләчнрлә хамдан байрин керг-үүлдврмүдт орлцвидн. Мадниг Москва һолын көвәд бәәдг «Президент отель» гиичлүрт бәәлһв, марһана бүрдәһәчнр олн зүсн харһлтс, экскурсь, хургуд бүрдәв. Түрүн өдр бидн мана хотл балһс һәәхч, автобусар болсн экскурстьд орлцвидн. Виолетта Галсан хойр түрүн болҗ Москвад одв, тегәд эднд цугнь соньн болн өврмҗтә болҗ медгдв. Хойрдгч өдртнь бидн «Царь-макет» музейд одвидн. Эн экскурсь бичкдүдт бәәтхә, маднд чигн бас йир соньн болв, орн-нутгиннь тууҗла таньлдҗ, балһсдын ке-сәәхн бәәшңгүд, һәәхмҗтә ормс тенд үзвидн. «Эк-эцкнрин сүв-селвг» гидг хургт орлцад эврә өрк-бүлиннь, хальмг улсин тууҗин, авъясмудын тускар келҗ өгвидн. Цаһан Анджаевна Орс келн-улсин гимназьд багшлна, эн хазгудын классин һардач болна, тегәд көдлмшиннь тускар бас хувалцв. Хальмг улс болн хазгуд бичкдүдт төрскнч сурһмҗ өглһнд, өвкнриннь авъяс хадһллһнд ямаран оньг тусхадгин тускар келҗ өгсиг хургт орцлачнр оньган өгч соңсад, кесг сурвр өгв. Хальмг Таңһчин тускар тодрхаһар келәд, гиичд ирх үрвр кеснь темдгтә болв. Һурвдгч өдртнь марһанд дииләчнриг Кремлевск Бәәшңд цуглулад, ачлвр бәрүлҗ өгв. Әрәсән күч-көлснә болн социальн харслтын министр Антон Котяков өрк-бүлмүдиг йөрәһәд, мана орн-нутгт өрк-бүлмүдт килмҗ тусхаҗ дөңнлһнд ик оньг өггдҗәнә гив. Ирх җилд Әрәсән Президент Владимир Путинә шиидврәр «Өрк-бүл» гидг келн-улсин төсв экләд күцәгдхиг темдглв, – гиҗ Олег Владимирович Москвад давулсн өдрмүдин тускар келҗ өгв.
Марһанд орлцачнрин төлә зург цокуллһна керг-үүлдвр болв. Цереновихн хальмг болн хазгудын хувцта, «Әрәсән сән гисн өрк-бүлмүд» гисн темдгтә киилг өмсч зурган цокулв. Келн-улсин хувцн цуглрсн улсин төлә ке-сәәхн болн өврмҗтә болв, тегәд кесгнь эднлә хамдан зурган цокулхар седв. Сән авъяст тохрсар, җил болһн Әрәсән марһанд диилвр бәрсн өрк-бүлмүдин туск дегтр барлҗ белглгднә. Терүнд өрк-бүл болһна тууҗ, зургуд барлгдна. Эн җил дегтр электронн эв-арһар шишлң сайтд барлгдхмн гиҗ шиидгдв, болв өрк-бүлмүдин сурврар урдк кевәр цааснд барлх арһ хәәх болв.
- Москвад давулсн өдрмүд уданд тодлгдхнь лавта. Мана бичкдүд түрүн болҗ хотл балһснд одв, бидн кесг регионас ирсн өрк-бүлмүдлә таньлдҗ, цааранднь бат залһлда бәрҗ, гиичд ирх болҗ үгцвидн. Иим марһас өрк-бүлмүдт үүдәгч кевәр үүлдҗ, билг-эрдмән үзүлхд, келн-улсиннь сойл болн авъясмуд делгрүллһнд ик урмд өгнә. Марһанд диилвр бәрсн өрк-бүлмүд цуһар седвәртә, билгтә, төрскн һазр-усндан эңкр, ниитә болн үр-иньглгч улс болна, бидн дииләчнр болсндан байрта бәәнәвидн. Маднд дөң-тусан күргсн Хальмг Таңһчин социальн делгрлтин, күч-көлснә болн көдлмшәр тетклһнә министерствд, «Хальмг үнн» газетин ах редактор Бембин Евгенийд, нертә дууч Босхмҗин Дианад болн ДДТ-н багш Увшин Татьянад ик ханлтан өргҗәнәвидн, – гиҗ Цереновихн байрарн хувалцв.
ДООҖАН Наталья
ЗУРГТ: Цереновихн «Җилин сән гисн өрк-бүл» Әрәсән марһанд дииләчнриг ачллһна байрт орлцв