Әәмшгтә гемәс саглулхар

Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Марина таңһчин залврин медлд үүлддг санитарн-противоэпидемическ комиссин сүүр давулв. Терүнд моом гемәс саглуллһна немр керг-үүлдврмүд күцәлһнә болн уудг усар тетклһнә төрмүд хәләгдв.

Өдгә цагт таңһчд селәнә эдл-ахун мал дунд хальдврта гемин туст бәәдл сән болв орн-нутгин зәрм ормд нәрн бәәдл учрна. Сүл цагт моом гемин туст му бәәдл тогтсн Казахстанас Әрәсәһүр эн гем авч ирдг йовдл учрдгас иштә таңһчд бәәдл бас му талагшан хүврх әәмшг бәәнә. Тегәд моом гем түгшгон төлә терүнәс хөрлһнә керг-үүлдврмүд батлгдв. Кемр нәрн бәәдл учрсн цагт дааврта министерствс, бүрдәцс ямаран керг-үүлдврмүд күцәхин диг-даран белдгдв. Эн керг-үүлдврмүд дунд малын үкәриг чикәр бәрлһн, ветеринарн кергүд күцәлһн, олна малд саглуллһна тәрлһ келһн эрк биш күцәгдх зөвтә гиҗ селвлцәнд темдглгдв. Тер мет яармд болн базрт шишлң ормас нань талдан һазрт мах болн махна хот-хол хулдхас, олн әмтн хот уудг бүрдәцст гемтә малын мах олзлхас саглх кергтә. Хальмг Таңһчин ветеринарийин заллтын һардачин дарук Качкана Виталий, Россельхознадзорин таңһчар үүлддг заллтын һардач Бакугина Жан тодрха тооцаһан өгв.
Эпидемиологическ бәәдл нәрн болсн цагт эмнлһнә бүрдәцс дөң күргхдән белн бәәхин туст неквр бас тәвгдв. Тиигәд, хальдврта гемәр гемтсн улст ахр цагин эргцд эмнлһ эклһнә, саглуллһна тәрлһ келһнә төрмүд хәләгдв.
Әмтиг сән чинртә уудг усар тетклһнә төр бас сүүрт хәләгдв. Роспотребнадзорин таңһчар үүлддг заллтын зәңгәр, 2024 җилин йисн сарин ашар таңһчин әмтнә 71,5 процентнь төв булгас усар теткгднә, эннь худгуд, бурһу, боодгуд болна. Дәкәд 14,7 процентнь хулдҗ авсн ус олзлна. Таңһчин ЖКХ-н министерств болн райодын бүрдәцсин толһачнр уудг усар тетклһнә төр хаһллһна туст кегдҗәх көдлмшин тускар келҗ өгв. «Цевр усн» гидг төсвин медлд эн төр хаһллһна керг-үүлдврмүд күцәгдҗәнә. Лаганьд, Яшлт, Ульяновское болн Троицкое селәдт усар тетклһнә объектс тосхгдҗана.
ДООҖАН Наталья