Депутатнрин буйнта керг

Хальмг Таңһчин Улсин Хуралын (Парламентин) депутатнр Луганск Улсин Республикин Антрацитовск района әмтнд дөң күргҗ, мана хойр регион хоорнд батлгдсн нөкцлт делгрүллһнд ик оньг өгнә. Одахн депутатнр бәәрн әмтнә төлә дулан хувц, хот-хол болн өдр-бүрин йовудт керглгдх нань чигн эд-тавр илгәв.

- Бидн Антрацитовск муниципальн бүрдәцин һардврла бат залһлда бәрҗ, ямаран төрмүд эдниг үүмүлҗәхин, ямаран керг күцәхд мана дөң кергтә болҗахин тускар соньмснавидн. Дулан хувц-хунр, хот-хол илгәсн цагтан бәәрн әмтнд килмҗән тусхаҗ, эдниг бачм бәәдлд һанцарнь үлдәшгоһар, дарунь нөкд болхар шуннавидн. Таңһчин Улсин Хуралын депутатнр Антрацитовск района әмтнд дөңгән күргхдән белн бәәнә, – гиҗ зака үүдәгч бүрдәцин Ахлач Артем Михайлов темдглв.
Депутатнр Пүрбән Олег болн Гаджи Фероян хувц, хот-хол болн нань чигн эд-тавр хулдҗ авлһнд болн хаалһин һару даңцалһнд демән күргв. Буйнч седклин керг-үүлдврин йовудт бичкдүдт онц оньг тусхагдв. Әрәсән Федерацин Хүүвин элч Хачра Борис Антрацитовск муниципальн округин бичкдүдин садмудт наадһас, хувц, олн наадд, хораст сән таал тогталһна төлә олзлгддг кергсл хулдҗ авв. Келхд, сенаторин седвәрәр давсн сард мана таңһчин бичкдүдин садмуд болн шишлң цергә керг-үүлдврт орлцачнрин үрд наадһасар болн спортивн кегдлмүдәр теткгдсн билә. Ода ЛНР-ин Антрацитовск района сурһулин бүрдәцс тиим белг авв. «Күнд бәәдл тогтсн болв чигн бичкдүд наадх болн билг-эрдмән делгрүлх зөвтә. Мана илгәсн белг эдниг байрлултха», - гиҗ таңһчин Улсин Хуралын Ахлач келв.
«Негдсн Әрәсән баһ наста гвардь» Әрәсән олна җисәнә Хальмг Таңһчд үүлддг региональн әңгин болн «Цергч» цергә-спортивн белдврин болн төрскнч сурһҗмин төвин гешүд Антрацитовск районд йовулгдҗадг хувц-хунриг, хотыг, талдан эд-тавриг цуглулад диглсн деерән дарунь көлгнд ачҗ йовулхд дөңгән күргв.

ДООҖАН Наталья