Лаганя района умшачнрт ханлтан өргв

Эн җилин һаха сарин 1-әс авн 2025 җилин түрүн өрәлд барт бичгдлһнә дааврта кем эклв. Эн саамд мана седкүлчнр таңһчин селәд- поселкудар йовҗ,эврә умшачнрла харһдг мөн. Шидр иим нег харһлт Лагань балһснд болснь бас эврә учрта гих кергтә,юңгад гихлә минь эн районд хамгин олар хальмг газетән бичүлҗ умшдг болна. Тегәд кесн ачиг хәрүлдг гидгәр,Көк теңгсин көвәд бәәдг «Хальмг үннә»итклтә үүрмүдтән ханлтан өргҗ,бүлән үгмүд келснь басл зөвтә болв.
Лаганя района муниципальн бүрдәцд болсн харһлтд орлцсн «Калмыкия» таңһчин зәңгллһнә агентствин һардач Хонгор Марилов болн эн районла олн җилин эргцд бат залһлда бәрҗ үүлдҗәдг «Хальмг үннә» ах редакторин дарук Любовь Пюрвеева эндр өдр таңһчд барлгддг һарцсин тускар тодрхаһар келәд,хамгин шунмһа умшачнран ачлв. Района толһач Юрий Когаев ирсн гиичнриг бүләнәр тосад, РМО-д болсн харһлтыг һардҗ давулв.
Келхд, энд бәәдг төрскнч седклтә, эврә келн-сойлдан хару олн умшачнр олн җилмүдин эргцд хальмг газетән дөңнҗ бичүлҗ авдгнь мел үнн. Эн кемд хамгин түрүнд района сурһуль-эрдмин цуг бүрдәцсин, Лагань балһсна политехникумин болн района эмнлһнә коллективсиг ончлҗ, эднә хайгар ханмҗта үгмүд келх кергтәнь басл орта болв. Тегәд эн өдр Лаганя РМО-н сурһуль-эрдмин болн сойлын әңгин ахлач Мерген Очировд, политехникумин һардач Александр Харкебеновд болн эн района эмнлһнә ах эмч Николай Шараповд Хонгор Марилов «Калмыкия» РИА-н нерн деерәс Ханлтын бичгүд болн үнтә белгүд бәрүлҗ өгәд,наадкстан үлгүр болҗ көдлҗәдг улсиг магтҗ буульв. Эн саамд ирсн гиичнр онц йөрәлин үгмүдән у-сарул седклтә,халуч зүрктә, мана газетин өөрхн үр-иньг болсн Лаганя района муниципальн бүрдәцин һардврин толһач Юрий Когаевд нерәдҗ келснь басл зөвтә болв.
- Эврән Көтчнрә районд өсәд-боссн учрар баһ цагасн авн хальмг газетән умшҗ йовнав. Миниһәр болхла,эврә төрскн келән-сойлан эрк биш дөңнх кергтә, эс гихлә мана Хальмг Таңһчин цаарандк делгрлтин тускар ода юуһинь келхв…
Би болхла альд эс көдлв, кенлә эс үүрлв, даңгин эврә келнә төр босхч, халун цуста хальмг күн болҗасарн бахтх кергтә, хальмгин нерән өөдән бәрх кергтә, гиҗ кен-негнднь келнәв, тегәд мана эмнлһнә күч- көлсч коллективин гешүд чигн барт бичгдлһнә кергт шунмһаһар орлцдгнь тер, - гиҗ ах эмч Николай Шарапов эднә ач-тусинь онц темдглҗ йөрәснднь зүркни ханлтан өргҗ, мадниг дөңнснь бас икәр байрлулв.
Үр-иньглгч таалд давсн харһлтыг ашлҗ келхләрн, Юрий Когаев лаганяхн цааранднь чигн төрскн газетән оларн бичүлҗ авхинь иткүләд, ирсн гиичнрт цуг халхар күцәмҗ дурдв.

Шагҗин Любовь
Зургт: «Калмыкия» РИА-н һардач Хонгор Марилов
Лаганя района толһач Юрий Когаевиг ачлҗ йөрәв