Мод урһалһн – олнд ик туста керг

Өрк-бүлин җил төгсч йовна. Эн җилин йовудт таңһчин болн орн-нутгин кесг керг-үүлдвр күцәгдлә. Тер тоод «Өрк-бүлин урһмлын сад» гидг керг-үүлдвр бүрдәгдв. «Навигаторы детства» гидг федеральн төсвин Хальмг Таңһчин көрңгин төвин седвәрәр тиим керг Элстин болн райодын цуг сурһульмудт җилин эргцд торхагдҗана.

- Тер «Өрк-бүлин урһмлын сад» гидг кергт ут турштан 35 сурһулин болн 5 колледжин багшнр болн сурһульчнр, теднә эк-эцкнр болн элгн-садн орлцв. Эдн ут тоодан 1500 мод болн бут суулһв. Кирцхд 700 өрк-бүл олна эн җисәг дөңнв. Тиим кевәр мана төвин седвәрәр кесг улсиг бидн олнд туста эн керг-үүлдврт орлцулҗанавидн. Мана таңһчин селән болн балһсн болһнд мод урһалһн ик туста керг болҗана, мана төв терүг цааранднь чигн өргҗүләд бәәх, – гиҗ «Навигаторы детства» таңһчин көрңгин төвин һардач Сараңкан Екатерина тоолвран келв.
Сүл саамд үкр сарин эклцәр эн керг-үүлдврт Элстин 23-ч тойгта дунд сурһулин бичкдүд болн арвтнр, теднә өрк-бүлмүд орлцҗ, модд болн бут суулһв. Сурһулин һардачин селвгч Наталья Братышева тиим седвәриг татв. Сурһульчнр ик шунлттаһар эн кергт орлцв. Тиим сән үлгүр үзүлснднь сурһулин коллективд ханлтан өргҗәнәв, – гиҗ Екатерина Эрдниевна келв.
Академик Эрднин Пүрвән нертә Элстин 23-ч тойгта сурһулин хашад күүкд болн теднә эк-эцкнр 108 мод суулһв. Эн өрк-бүлмүд сурһулин һазак бәәдлинь кеерүлҗ, олнд туста керг күцәв. Оошг цецгүдиг чигн өрк-бүлмүд суулһв, мод суулһсн өрк-бүлин нер-уснь бичгдв, тиим кевәр күүкд тер урһмлыг хәләҗ килмҗән өгч урһах.
- Мана күүкд йиртмҗд дурта, терүг харсхд кезә чигн белн, тегәд «Өрк-бүлин урһмлын сад» гидг керг-үүлдврт цугтан гилтә эк-эцктәһән ирәд орлцв. Тиим сән седклднь цуг мана сурһульчнрт ханлтан өргҗәнәв, гиҗ селвгч Наталья Братышева келв. – Дала күн ирв, нам школын хашад мод суулһлһна кемд шуугата болад бәәв. Одахн болхла багшнр мана бүрдәцин герин хаша ахуллһнд орлцҗ, хог-богиг цуглулад, цевр-цер ке сәәхн бәәдл тогтав. Тиим кевәр мана сурһулин эргндк һазриг цааранднь чигн хадһлх кергтә, – гиҗ Наталья Николаевна темдглв.
Тиим керг ик туста гиҗ хара келсн юмн биш. Сара хонг хооран Элстд шора-тоосн көдләд, нам аһар киилхд харшлтта болад бәәв. Яһад тиим бәәдл учрв гихлә, Элстин эргнд бәәсн урһмлын ик зунь уга кегдв, түүнәс көлтә чигн бас шора-тоосн һарв. Тиим юмн бичә учртха гиһәд урһа мод, бут суулһлһиг өргҗүлх кергтә. Урһа модна эдл-ахун көдләчнр эн көдлмшиг өргнәр күцәҗәнә, болв тер үүлдврт улм икәр әмтн орлцхла, мана бәәдл-җирһлин таалыг бидн улм түргәр ясрулҗ чадхвидн. Тегәд хотл балһсна сурһульчнр туста керг күцәҗәнә.
Селән болһнд урһмлын то икдхлә, эргндк һазр чигн кеерүлгдх, йиртмҗин таал чигн ясрх. Тиигҗ «Өрк-бүлин урһмлын сад» гидг кергт шунмһа кевәр орлцтн гиҗ таңһчин «Навигаторы детства» гидг бүрдәц үрвр кеҗәнә, терүнд улм ик то сурһульчнр болн теднә өрк-бүлмүд орлцх гиҗ нәәлҗ болхмн.
ТҮРВӘН Һуна