Әмтнә төрмүдт орлцҗ, дөңгән күргв

«Хальмг Таңһчин Улсин Хуралын (Парламентин) депутатын чинрин туск» таңһчин заканас иштә депутатнр суңһачнрлаһан харһҗ, эврәннь үүлдврин туск тооцаһан өгх зөвтә. Депутатнр сүл зурһан сарин эргцд ямаран закана төсвс батлсна, суңһачнрин неквр күцәлһнә, таңһчин күцәгч йосна болн талдан регионмудын зака үүдәгч бүрдәцслә нөкцлтин халхар ямаран керг-үүлдвр давулсна тускар келҗ өгв.

Мөрн сарин эклцәс авн хулһн сарин 1 күртл таңһчин Улсин Хуралын тавн сессь болв, терүнд депутатнр әмтнә ниигмин харслтын, өнчн болн эк-эцкин хәләвр уга үлдсн бичкдүдин зөв харслһна, социальн теткврин, олн давхр гермүдт әрк-чаһр хулдлһиг ууруллһна, алвна туск болн нань чигн талдан закадт сольвр орулв. Батлгдсн диг-даранла ирлцәтәһәр депутатнр әмтнлә харһад, эдниг үүмүлҗәх төрмүдт орлцҗ, дөң күргв. Тер мет депутатнр Хальмг Таңһч болн Луганск Улсин Республикин Антрацитовск район хоорнд батлгдсн нөкцлтин халхар бәәрн улст буйнч седклин дөң күргҗ, хот-хол, дулан хувц-хунр, өлг-эд, эм болн нань чигн тоот күргҗ өгв. Эн җилин хаврар Элстд Әрәсән Өмн үзгин федеральн дуһргин хуралмудын ассоциацин дарани хург болв, терүнд 11 субъектин болн Абхазь Республикин Улсин Хургин депутатнр цуглрв. Депутатнр әмтнлә харһҗ тооцаһан өгсн кемд цуг эн көдлмшин тускар тодрхаһар келҗ өгв.
Депутат Эрднин Гилән суңһачнрла болсн харһлтд зурһан закана болн тогтаврин төсвс белдлһнд орлцсна тускар келәд, ямр кевәр тедн күцәгдхин, ямаран шинрлтс батлгдсна тускар хувалцв. Тиигәд, депутатнр Бадмин Вячеслав, Җаңһан Чимид, Дорҗин Артур, Кокан Михаил, Мацга Татьяна болн нань чигн депутатнрла хамдан эн олн давхр гермүдт әрк-чаһр хулддг лавкс хаагдхин туск седвәр татв. Эн закана төсвиг депутатнр нег дууһарн дөңнҗ, баһчуд дунд чик авг-бәрц батруллһнд, аля-азд йовдлмудас саглуллһнд туслх гиҗ тоолҗана. Эн закан ирх җилин моһа сарас авн бәәдл-җирһлд тохрагдхмн. Гилән Игоревнан келсәр, эн мөрн сарас авн долан дәкҗ әмтнлә болсн харһлтд орлцв, хөрн һурвн эрлһ хәләһәд, тедниг хаһлхд дөңгән күргҗ, сүв-селвгән өгв. Таңһчин социальн-экономическ делгрлтин көтлврин медлд депутат хотл балһсна моһа сарин 8 уульнцд болн 1-ч микрорайонд бичкдүдин нааддг тавлң тосхлһнд туслв. «Әәмшг уга болн сән чинртә хаалһс» гидг келн-улсин төсвин халхар Элстд Витражная уульнцд хату девскртә хаалһ тосхлһна төр хаһлв, «Гер-бүүр болн балһсна кец-таал» гидг келн-улсин төсвсин медлд хуучн гермүдәс әмтиг нүүлһҗ авлһна төриг һол оньгтан бәрҗ, суңһачнртан эн туст дару-дарунь цәәлһвр өгнә. «Мана округин медлд ордг социальн бүрдәцст ясвр келһнә болн материальн-техническ ул батруллһна төр нанд хамгин чинртә болна. Тегәд 10-ч болн 16-ч тойгудта бичкдүдин садт ясвр кехмн, 10-ч тойгта дунд сурһульд спортивн бүрдәцин шидр сән кец-таал тогталһна көдлмш күцәхмн гиҗ зуралгдҗана. Эн төрмүдиг эрк биш хаһлҗ, бичкдүдин болн сурһульчнрин төлә сән таал тогтахвидн», – гиҗ депутат үгән өгв.
Улсин Хуралын хазна, экономическ политикин әңгин һардач Хаалһин Очр бас әмтнлә харһад, кеҗ-күцәсн көдлмшиннь туск тооцаһан өгв. Энүнә һардҗадг комитет тавн сүүр давулв, терүнд дөрвн закана төсв хәләгдв. Эн әңгин депутатнр таңһчд бәәдг олн патьрта гермүдин олна өлг-эдин бат ясвр келһнә туск закана төсвин седвәр татсмн, таңһчин хазна заканд сольвр оруллһна чинртә төрт орлцсмн. Хаалһин Очр дорас өсч йовх баһ үйд төрскнч сурһмҗ өглһнд, бичкдүд болн баһчуд дунд чик авг-бәрц батруллһнд ик оньг тусхана. Тиигәд, эн балһсна 6-ч микрорайонд 5-ч тойгта болн 2-ч микрорайона 35-ч тойгта гермүдин өөр футбол нааддг талвң тосхч көвүдт сән таал тотгаснь эднд ик байрта йовдл болв. Келхд, 6-ч микрорайонд спортивн талвңгин тосхлтд Очир Владимирович һардҗадг «Хальмгин десантникүдин ниицән» гидг олна бүрдәцин шүүҗ авсн мөрән мөңгн олзлгдв. Суңһачнрин төрмүдт шунмһаһар орлцҗ, депутат теднә сурврар цуг халхин дөң күргнә. Тиигәд, 6-ч микрорайона 1-ч герин әмтнә сурврар олн зүсн урһмл суулһхин төлә хар шавр авч ирв, эн микрорайона 5-ч тойгта, Клыковин нертә уульнцд 138-ч болн 2-ч микрорайона 31-ч гермүдин өөр хог-бог цуглулдг һазрт болн Клыковин нертә уульнцд 144-ч герин өөр көлгнә зогсалыг хату девскрәр бүркв.
Хаалһин Очр тавн җилин эргцд «Комбат» гидг цергә-спортивн болн төрскнч сурһмҗин клубин үүлдвриг күцәнә. Эн сар болһн клубин үүлдврт 30 миңһн арслңга дем күргнә. «Төрскнә харсачнр» гидг шаңһа саңгин таңһчд үүлддг әңг һардҗадг төләдән Очир Владимирович цергә шишлң керг-үүлдврт орлцачнрин болн эднә өрк-бүлин гешүдин төрмүдт орлцна. Цергчнрин зөв харслһна, эмнлһнә, реабилитацин кегдлмүдәр тетклһнә болн нань чигн төрмүдт депутат килмҗән тусхаҗ дөңгән күргнә. «Медрл» гидг олна бүрдәцлә хамдан «Медрл.Баатрмуд» гидг төсвин халхар «Медрл» - Төрскндән церглҗәнәв!» гидг керг-үүлдвр давулв. Цергә керг-үүлдврт орлцачнриг дөңнлһнә көдлмшиг үүлдвриннь һоллгч зөрүллт болҗахиг депутат темдглнә.

ДООҖАН Наталья