ЛНР-т хальмг мах хулдҗана

Хальмг Таңһчин улс Әрәсән ханьд орсн Луганск Улсин Республикин Антрацитовск районд дөң-тусан даңгин күргнә. Амр биш таалд туссн эврәксән хайдмн биш, гиҗ олн зүсн эд-тавр, эдл-ууш, хувц-хунр болн нань чигн тоот илгәгднә.

Одахн тенд бәәдг лавкст хальмг махн йовулгдв. «Мой бизнес» төвин барин цергллтин зәңглсәр, ЛНР-т Хальмг Таңһчас махна зүүтә эдл-ууш даңгин илгәгднә. Шидр дөрвн тонн үкрә махн болн 200 килограмм хөөнә махн тиигәрән йовулгдв. Антрацит балһснд бәәдг Горняк нертә лавкд хальмг махн хулдгдхмн.
– Иим нөкцлт хойр региона экономикин халхин делгрлтд тусан эрк биш күргхмн, – гиҗ «Мой бизнес» төвин һардач Чояна Виктор темдглв.
Тодлхас, Хальмгин экономикин болн хулд-гүүлгәнә министерств Антрацит балһсна һардврла батлгдсн бооцана йовудт эн керг күцәгдҗәнә. Терүнәс нань нег һазра арһлачнран дөңнхин төлә эн керг бас бүрдәгдв, гиҗ «Мой бизнес» төвд зәңглв.
БАДМИН Занда