Арһлачнриг дөңнәд

Хальмг Таңһчин Толһач Хаска Батун даалһврар таңһчин селәнә эдл-ахун арһлачнрин орлцлһтаһар ирлцңгү харһлтс даңгин давулгдна. Шидр тиим дарани селвлцән Хальмгин селәнә эдл-ахун министерствд болв. Таңһчин залврин Ахлачин дарукин үүлиг дааҗадг Җамбинә Очр, селәнә эдл-ахун министрин үүлиг дааҗадг Гаван Тимур, Хальмг Таңһчин Улсин Хуралын (Парламентин) депутат Кокан Михаил болн таңһчин фермермүд орлцв.

Селвлцәнә йовудт мал өсклһнә, дөңнлһнә немр эв-арһсин төрмүд босхгдв. Эн җилд таңһчин эдл-ахусар ут тоодан 1,2 сай хөн болн яман, тер мет 200 миңһн һар бод мал төл авлһна кемд орхмн. Йиртмҗин бәәдл учртан авгдад, ирх җилд сән төл авхар зуралгдҗана. Терүнәс нань харһлтд онц зөвтә кредитн мөңг өглһнә төрәр күүндвр бас болв.
Харһлтын чилгчәр Гаван Тимур таңһчин Улсин Хуралын (Парламентин) депутат, селәнә эдл-ахун төрмүдиг хаһлдг комитетин һардач Кокан Михаилыг ирлцңгү министерствин Ханлтын бичгәр ачлв. Тер кевәрн хамцу үүлдврән күцәҗ, нәрн төрмүдин арһинь олҗ, цаарандан даавртаһар көдлхән Тимур Сергеевич медүлв.

ОЛЬДАН Цаһан