Хальмг Таңһчд ясврин көдлмш сән йовудтаһар күцәгдв

«Негдсн Әрәсә» партин ханьд орҗадг депутатнр болн сенатормуд садмудт болн колледжмүдт 2025 җилд кех бат ясврин йовудыг бүрткх.

Одахн маднла хам-хоша бәәдг Аһш балһснд «Негдсн Әрәсә» партин болн орн-нутгин гегән-герлин министерствин селвлцән болв. Энд сурһульмудын, бичкдүдин садмудын болн колледжмүдин бат ясврин болн шин бүрдәцс тосхлһна тускар тодрха күүндвр болв.
Иргч 2025 җиләс авн 2027 җил күртл бат ясвр кех тиим бүрдәцсин туск цаасиг «Негдсн Әрәсә» парть орн-нутгин гегән-герлин министерствд орулҗ өгв. Партин генеральн хүүвин сегләтрин үүл дааҗадг Владимир Якушевин келсәр, парть ясврин көдлмшиг бүклдән бүрткхәр зуралҗана. Тиим герчллһиг бат ясврин көтлврт нерәдсн Цугәрәсән селвлцәнд партин һардгч элч кев. Эн харһлтд РФ-н гегән-герлин министр Сергей Кравцов бас орлцв.
«Регионмудт бат ясвр кедү бүрдәцд кергтә болҗахинь «Негдсн Әрәсә» партин элчнр медҗ авла. Ут тоодан 3210 сурһуль, 276 колледж болн 837 сад ясгдх болв. Тер мет шин сурһулин 68 гер болн 63 сад тосхгдх гиҗ зуралгдҗана.
2022 җилд Әрәсән Президент Владимир Путинә седвәрәр орн-нутгин сурһульмудт бат ясвр келһнә өргн көдлмш эклв. Тер кемәс авн 2024 җилин үкр сар күртл 4491 сурһулин герт цуг тал ясрулгдҗ, өдгә цагин бат ясвр кегдв, тер тоод эн җил 406 гер бас ясгдв. Тер көдлмшиг сәәнәр күцәсн регионмудын тоод Москван, Рязаня мүҗс, Хальмг Таңһч, Татарстан, Адыгея, Ингушеть, Чеченск Республикүд йовна.
– Эн регионмудт зуралсн ясврин көдлмш күцц кевәр кегдв. Тиим сән ашт күрсн төләднь регионмудын һардачнрт, теднә депутатнрт ханлтан өргхәр седләв. Тер мет эк-эцкнр эн кергт шунмһаһар орлцв, эднә шунлтын болн бүртклһнә ашт көдлмшин чинр бас өөдләд бәәснь лавта. Эн җилин чилгч күртл сурһулин 280 гер эдлврт орулгдх, – гиҗ Владимир Владимирович темдлглв. Садмудт болн колледжмүдт бат ясвр келһнә тускар Әрәсән Президент эврә илгәврт келсмн гиҗ партин элч тодлулв.
Тер мет селвлцәнд «Шин сурһуль» гидг партин төсв яһҗ күцәгдҗәхин тускар шинҗллт кев. Тер тоод 2024 җил Хальмг Таңһчд сурһулин 6 герт бат ясвр кегдв, тиим кевәр 16 миңһн күүнә төлә сурһулин таал ясрулгдв.
Бат ясврин көтлврт колледжмүд болн садмуд орхла, ик то баһчуд болн бичкдүд сән таалд гүн медрл авхмн. «Негдсн Әрәсә» партин седвәриг садмудын болн колледжмүдин коллективс дөңнҗәнә. Мана таңһчд сурһульмудт бат ясвр кегдснә хөөн цуг таалнь йостаһар ясрсиг эдн үзҗәнә, тиим ясвр теднә садмудт кегдх гиҗ бас күләҗәнә.
Ода мана таңһчд 110 һар бичкдүдин сад болн 10 һар колледж бәәнә, теднә гермүдт кесг арвад җилмүдин туршарт ясвр кегдәд уга билә, ода эдн чигн партин седвәрин дөңгәр таалан үзмҗтәһәр ясрулх. Эднә олзлҗах кергсл чигн шинрүлгдх, тегәд бичкдүд өсклһнә болн көдләчнрин өдгә цага кадрмуд белдлһнә халхар ик күцәмҗ бәрҗ болхмн.
Эн төрәр эврәннь тоолвран сурһульмудын болн садмудын һардачнр медүлв. Тер тоод Элстин 12-ч тойгта сурһулин һардач Бембин Борис иигҗ келв: «Мана сурһулин гер 1971 җилд тосхгдла, тер цагас нааран бат ясвр кегдәд уга билә. 2022 җилд бидн шинрүлгдсн бәәшңдән нүүҗ орвидн, дулана, усна болн нань чигн сурвлҗн шинрүлгдв, ода бидн зовлң угаһар бәәнәвидн. Тосхачнрт ик ханлтан өргҗәнәв, тер мет «Негдсн Әрәсәһәс» суңһгдсн депутатнр урднь чигн эн кергиг бүрткәд, тосхлтын чинринь өөдлүлв. Эндр эдн шин седвәр үүдәҗәнә. Эднә һардврт мана таңһчин сурһульмуд, садмуд, колледжмүд бат ясврин хөөн өдгә цагин йир сән таалд көдлхнь лавта. Мана салврин көдләчнрт күцәмҗ дурдҗанав».
Тер мет Элстин 29-ч бичкдүдин садын һардач Лиҗин Занда теңкән угаһар күләҗәх сольврин тускар бас тоолврарн хувалцв: «Мана садт бас кесг җилин туршарт бат ясвр кегдәд уга. «Негдсн Әрәсә» парть эн кергт маднд дөң болҗахнь йир сән, теднә седвәриг дөңнҗәнәв, депутатнрин бүртклһнә йовудт бат ясвр сән чинртәһәр күцәгдтхә, Элстин кесг садмуд тер кемиг күләҗәнә».
Тиим кевәр шин 2025 җил садмудын болн колледжмүдин көдләчнрин төлә байрта-бахмҗта болхнь лавта. Мана бичкдүд болн арвтнр сән таалд өстхә, таңһчдан болн орн-нутгтан ик тусан күргдг иргнмүд болтха!

ТҮРВӘН Һуна