Музеймүдин марһанд ончрв

Эн җил Әрәсән гегән-герлин министерств сурһульмудт бәәдг музеймүд дунд соньн марһа бүрдәсн билә. Хальмг Таңһчин сурһуль-эрдмин бүрдәцс терүнд шунлттаһар орлцв. Лаганя, Баһ Дөрвдә, Сарпан, Приютна, Хар Һазра райодын болн Элст балһсна дунд сурһульмуд региональн девсңгин марһанд орлцад, Очра Номтын нертә Элст балһсна 8-ч тойгта болн Сарпан района Х.А.Надеевин нертә Уманцевск дунд сурһульмуд ончрад, ашлгч марһанд орлцх зөв авсмн. Энүнә ашар Элстин 8-ч тойгта дунд сурһуль һурдвгч орм эзләд, нег һазра улсин төлә байр-бахмҗ үүдәв.

Шидр Әрәсән Федерацин Хүүвин сенатор Байир Путеев Элст балһсна һардврин толһач Лиҗикә Алдрла хамдан эн ончта марһанд йилһрсн сурһулин багшнриг болн сурһульчнриг йөрәхәр ирв.
«Алдр төрскнә салдсмуд» нертәһәр эн марһан давулгдв. Очра Номтын нертә Элстин 8-ч тойгта дунд сурһулин музейин һардач Элина Утигенован келсәр, музейд цуглулгдсн тоотыг сурһульчнр эврән авч ирцхәнә. Төрскән харсгч Алдр дәәнә ветеранмудын туск соньн зәңгс, зургуд болн цергә шишлң керг-үүлдврт орлцачнрин туск тоот бас тенд үзҗ болхмн. Келхәс, эн сурһулиг төгсәсн Владимир Балтыков болн Валентин Меркулов Төрскән харсад, СВО-н йовудт әмнәсн хаһцсн билә. Эн баахн хойр көвүнә зургуд бас музейд үзүлгдҗәнә.
Одахн сурһульд бат ясвр күцәгдәд, тенд сән таал тогтагдсиг күндтә гиичнр ил үзв. Сарул, герлтә герин хорасар йовҗ, шинрүлгдсн кергслиг болн цуг тоотыг тедн шинҗлв. Байир Эдуардович болн Алдр Васильевич шаңһа марһанд ончрсн сурһулин багшнриг болн сурһульчнриг йөрәҗ, шүүҗ авсн 200 миңһн арслңга сертификат болн диплом бәрүлҗ өгв.
Терүнәс нань йосна элчнр сурһулин хот уудг хораг бас хәләв. Тенд ах замч Борис Мишкинлә таньлдҗ күүндв. Темдглхд, тенд көдләчнр шимтә халун хот чандг деерән һуйрин зүүтә кегдлмүд эврән болһна. Күндтә гиичнр халун өдмг амсад һарв.
Сурһулин һардач Кермн Лиджеева гиичнрт ханлтан өргҗ, бат ясвр күцәснә хөөн өдгә цагин некврлә ирлцҗәдг бүрдәцд арвтнр сән медрл авч, сурһмҗллһна халхар олн зүсн керг-үүлдврмүдән бүрдәнә гив. Байир Путеев Лиҗикә Алдр хойр багшнрт болн сурһульчнрт күцәмҗ болн цаһан хаалһ дурдв.
ОЛЬДАН Цаһан