Седкүлчнр ачлгдв

Басң өдрлә «Негдсн Әрәсән» олна дөңнлтин штабд хальмг барин сән Өдрт нерәдсн байрин хург болв. Хальмгин министерствсин, ведомствсин, зөв-йос харлһна бүрдәцсин, таңһчин РМО-син элчнр терүнд орлцв.

Очра Номт болн Боован Бадм нертә хойр үүлдәч хальмгудыг гегәрүлхин болн бичлһнд орулхин төлә 1917 җилин үкр сарин 15-д түрүн болҗ «Өөрдин зәңгс» газет барас һарһв. «Улан Хальмг», «Таңһчин зәңг» гиҗ газет кесг дәкҗ нерән сольҗ, 1943 җил күртл һардг билә. 1957 җилд хальмгуд Сиврәс төрскн теегтән хәрҗ ирәд, шинәс һардг газет «Хальмг үнн» гидг нертә болв. Эн байрта йовдл хальмг седкүлчнрин керг делгрүллһнд ончта орман эзлв. Тер цагас авн зун һар җилдән таңһчин барин һарцс умшачнран соньн зәңгсәр байрлулҗ йовна. Эндр мана таңһчд төрскн келәр һардг «Хальмг үнн», таңһчин райодын 13 газет, «Теегин герл», «Байр», «Байрта», «Элистинская панорама», «Парламентский вестник» болн «Степные вести» газетмүдин седкүлчнр нег һазра улсиг таңһчд учрҗадг йовдлмудла таньлдулна.
Байрин хургин эклцәр Хальмг Таңһчин то-дигин делгрлтин министрин дарук Кичгә Александр седкүлчнриг йөрәһәд, Үстин района «Авангард» газетин редакцин көдләч Түрвән Антонинад «Залһлдана эрдмч» өөдән нерн зүүлһгдҗәхинь зәңгләд, ирлцңгү темдгинь бәрүлҗ өгв. Тер мет эн җилин хаврар Әрәсән Президентин суңһврин йовудт шунмһа кевәр орлцсн седкүлчнр таңһчин Толһачин Ханлтын бичгүдәр темдглгдв.
Тер мет талдан министерствсин, ведомствсин болн зөв-йос харлһна бүрдәцсин элчнр таңһчин газетмүдин болн седкүлмүдин редакцсин көдләчнрлә нөкцлтҗәдг улсиг йөрәҗ, Күндллһнә һашгудар болн Ханлтын бичгүдәр бас ачлв.
Байрин йовудт таңһчин нертә артистнр Брүгидикә Айса, Зулан Данзн, Баҗан Бадм болн С.-Г.Дорҗинә нертә Элстин 1-ч тойгта билг-эрдмин сурһулин домбрчнр концерт үзүлснь таамсҗта болв.
Барин ветеранмудын байн дамшлтаснь үлгүр авч, көдлмшән цаарандан даавртаһар күцәһәд, үнн, соньн зәңгс олҗ авхар даңгин шуннавидн. Сүл цагт баһчуд хальмг келән медхәр, дасхар зүткчәнә. Тегәд хальмг келәр һардг мана газетиг болн седкүлмүдиг нег һазра улс, нег үлү баһчуд умшад, мана кергиг дөңнҗ йовхинь иткҗәнәвидн.

КАРСАНА Евгения