Арһлачин керг амр биш болдгиг медв

Хальмг Таңһчд арһлачнрин җисәнә делгрлтд ик оньган өгч, региона һардврин болн залврин нилчәр баһ бүрдәцс секлһн, экспортыг өргҗүллһн өсәд йовна. Тер кергт «Росмолодежь» шаңһа агентствин көдләчнр шунмһаһар орлцҗ, баһчудт эврә салг-үүлдвр секлһнд дөң болҗ тиим төсвиг кесг регионд тохрана.
Одахн мана таңһчд Әрәсән шаңһа агентствин төсвиг күцәлһнә кемҗәнд «Арһлачин салг-үүлдврт давулсн өдр» гидг керг-үүлдвр болв. Түүнд Элстин 15-ч тойгта сурһулин арвтнр болн Эльвартинә Ильян нертә политехникин колледжин оютнр орлцв. «Терра Ариес» компаня ул деер арһлачин көдлмшлә таньлдлһн болв.
Хальмг тохма малын мах һарһлһна болн хулдлһна кергиг компань күцәнә, тер мет полуфабрикатмуд болн йоста нань чигн эдл-ууш һарһна. Эндр «Терра Ариес» 150 нерәдлһтә эдл-ууш һарһҗ, Хальмг Таңһчин йилһән сән арвад СПК-ла болн эдл-ахусла нөкцлтҗ көдлҗәнә.
«Терра Ариес» компаня ул деер болсн харһлтд баһчуд салг-үүлдврин һардач Булхука Дорҗла болн бизнес-дамшулач, хулд-гүүлгәнә әңг тогтадг шинҗләч Владимир Васьковла күүндвр кев. Эднә бүрдәц яһҗ делгрҗ йовсна, ямаран күцәмҗ бәрснә, һарчасн төр яһҗ хаһлгдҗасна, эврә эрдмәр ямаран дамшлт хоршасна тускар келҗ өгв.
Компаня элчнр «Росмолодежь» агентствин төсвәр ул кеҗ баһ наста арһлачнрин бат тогтацта ниицә бүрдәхәр седҗәнә. Эднә шүүҗ авсн баһчуд арһлачин орута көдлмшәр соньмсҗ кергән цааранднь өргҗүлхәр шунх зөвтә. Тиим төсв баһчудын ик зууднь таасгдв.
- Владимир Васьков Әрәсән «Орн-нутгин чидл» гидг социальн-сойлын делгрлтин олна бүрдәцин һардач, дамшлтта арһлач болн консалтингин агентствин эзн болҗана, тегәд баһчудла хувалцх дамшлт, өгх селвг энүнд баһ биш. Тегәд чигн тиим шинҗләчлә күүндвр келһн мана колледжин оютнрт цань угаһар таасгдв, – гиҗ политехникин колледжин һардачин дарук Жанна Сильнеева келв.
Тер мет Жанна Владимировнан келсәр, шинҗләч Владимир Васьков инвестиц орулҗ авлһна халхар ик дамшлт хоршасн мергҗлт, эврәннь клиентнрин төлә кесг җува арслң инвестиц орулҗ авсмн. Тер мет нөкцлтиг өргҗүллһнә халхар ик дамшлт хоршасн мергҗлт болҗана.
Компаня фермерин эдл-ахуһар болн цехәр оютнрин төлә Булхука Дмитрий экскурсь кев. Бизнесиг, салг-үүлдвриг һардлһна кесг эв-арһла баһчуд бас таньлдв, шинҗләчнр эднд тодрха цәәлһвр өгв. Оютнр эврә сурвран чигн өгв. Тиим мастер-класс көвүд-күүкдт икәр таасгдв, яһад гихлә эдн арһлачин салг-үүлдврт эдл-ууш һарһлһна болн хулдлһна көдлмш яһҗ күцәгдгиннь үзҗ дамшлтан бас хоршав.
- Селәнә эдл-ахун эдл-ууш һарһдг салг-үүлдвр маднд таасгдв, мана эк-эцкнр бас тиим керг селәнд болн балһснд күцәҗәнә. Тер хот-хоолыг яһҗ хулдхин, эврә кергән яһҗ бүрдәхин туск селвгиг бидн мергҗлтнрәс соңсснь йир туста болв, теднә мастер-классмуд бас мана шин дамшлт хоршалһнд ик нилчән күргв, – гиҗ ЭПТК-н 4-ч курсин оютн Роман Волосников келв. – Баһ бизнесән бүрдәхин төлә түрүн эклцин капитал, шунлт, нөкцлт бүрдәһәд, әмтнлә күүндҗ бооца батлдг седвәр болн дамшлт кергтә, терүг би бас эрк биш дасч авнав, – гиҗ Роман келв.
Тиим кевәр баһчуд бизнесин туск түрүн медрлән, дамшлтан хоршаҗ, шинҗләчин селвг соңсҗ өөрхн иргчд колледжән төгсәснә хөөн эврә салг-үүлдврән чигн бүрдәһәд арһлачнрин тоод орхла ик туста юмн болхнь лавта.
ТҮРВӘН Һуна