Оютнр болн багшнр эрүл-менд бәәтхә гиһәд

Одахн Хальмг ик сурһулин профилакторийин 45 җилин өөнд нерәдсн байрин хург болв. Энүг нүр үгәр эн бүрдәцин ах эмч Любовь Джексембекова секәд, коллективин ветеранмудыг йөрәв, эднд белгүд бәрүлҗ өгв. Цааранднь ах эмч профилакторийин күцәҗәдг үүлдврин тускар тодрхаһар келҗ өгв. Хамгин түрүнд энд көдлҗәдг эмчнр оютнрин болн хальмг вузин багшнрин эрүл-менд батруллһнд һол оньган тусхана. Зәрм оютнр нам сурһульд сурчаһад чигн гемтә-шалтгта болна. 2023 җилин ашар кесн то-дигәр, цуг оютнрин зуг 41 процентнь эрүл-менд болҗ йилһгдв, наадкснь гемтә-шалтгта болҗ һарв.