Төрскән харсачнриг дөңнхәр

Шидр Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Марина цергә шишлң керг-үүлдврт орлцачнриг дөңндг «Төрскән харсачнр» шаңһа саңгин үүлдврин төрәр ведомствс хоорндк таңһчин комиссин дарани сүүр давулв.
Хальмг Таңһчд үүлддг саңгин әңгин социальн зүүцүләчнрин теткврт бәәдг ветеранмуд дунд 16 күн күнд шалтгта болна. «Төрскән харсачнр» шаңһа саңгин әңгин һардачин дарук Чимдә Асян келсәр, цергә шишлң керг-үүлдврт орлцсн гемтә-шалтгта ветеранмудын гер-бүүрт сән таал тогталһна көдлмшт «ухата гер» гидг шишлң кергсл олзлгддг болна. Бас тер мет цергчнриг реабилитацин техническ эв-арһсар тетклһнә төр шишлң диг-дарала ирлцәтәһәр хаһлгдна. Өлзәтин Маринан темдглсәр, цергә шишлң керг-үүлдврт орлцачнриг техническ эв-арһсар болн протезн-ортопедическ кегдлмүдәр тетклһн шаңһа һоллгч төр болна. Тер төләд техническ эв-арһсар тетклһнә диг-даранд сольвр орулгдҗ, эдниг дарунь кергтә кегдлмүдәр теткх кергтә. Муниципальн бүрдәцст үүлддг комиссьмүд ветеранмудын гер-бүүрин таал шинҗллһнә, мөч тату улст сән таал тогталһна көдлмшиг дигтә-даратаһар күцәҗ, эн төриг һол оньгтан бәрх зөвтә гиҗ Марина Петровна темдглв.
«Төрскән харсачнр» шаңһа саңгин таңһчд үүлддг әңгин улд цергә-социальн төв (ВСЦ) секгдхмн гиҗ зуралгдҗана. Эн төв цергчнрин болн эднә өрк-бүлин гешүдин зөв харслһна, социальн теткврин төрмүд хаһллһнд туслхмн. Комиссьт орлцачнр зәңг-зә угаһар геедрсн цергчнриг олҗ авлһна көдлмшиг ВСЦ-ин болн цергә комиссариатын көдләчнрлә хамдан күцәлһнә тускар бас күүндв. Тер мет селвлцәнд цергчнриг көдлмшәр тетклһнә, шин эрдм даслһнд дөң күрглһнә төрмүд бас хәләгдв. Ода деерән мана таңһчд СВО-д орлцсн 92 күн көдлмшәр теткгдв. Эн төриг «Төрскән харсачнр» шаңһа саңгин әңг әмтиг көдлмшәр тетклһнә цергллтлә хамдан хаһлҗ, цергчнрт дөң-тусан күргҗәнә. Эн төрт онц оньг тусхаҗ, Төрскән харсачнриг көдлмшәр тетклһнд дөң күргх кергтә гиҗ Өлзәтин Марина райодын муниципальн бүрдәцсин толһачнрт даалһвр өгв. Селвлцәнд хәләгдсн төрмүдәр таңһчин ведомствст болн райодын толһачнрт некврмүд батлгдад, комиссин бүртклһнд авгдв.

БАТАН Сәәхлә