Көгҗмин зевсгүдәр теткв

Элст балһсна негдгч тойгта билг-эрдмин сурһулин сурһульчнрт көгҗмин шин зевсгүд ик байр үүдәв. Келн-улсин төсвин кемҗәнд эн сурһуль көгҗмин зевсгүдәр теткгдв. Энүнлә хамдан сурһулин-методическ утх-зокъял чигн «Сойлын халхд кергтә тоотыг делгрүллһнә чинртә шин девсң тетклһн» гидг шаңһа көтлврәр тернь күцәгдҗәнә.

Таңһчин сойлын болн зуульчллһна министрин дарук Саңҗрһа Германа келсәр, билг-эрдмин бичкдүдин сурһулин болн көгҗмин шишлң сурһуль дасхчах бүрдәцсин материальн-техническ көрң ясруллһнд эн үүлдвр залгдҗана. Тер көтлврәр йилһгдсн мөңгәр хур, баян, домбр, ечин, орс домбрмуд, пианино, саратовск һарма, ксилофон, флейта, электронн зевсг хулдҗ авгдв.
Зевсгүдиг дахулад көгҗмин әәһинь икдүлдг тоот, сурһулин-методическ дөңцлмүд сурһульчнрт кичәлднь олзлх гиҗ хулдҗ авгдсмн.
Көгҗмин зевсгүдт айс орулҗ, тедн ямаран әһарһдгинь медҗ авхар сурһульчнр зевсг болһниг оньган өгч хәләв, олн-зүсн айс татч багшнр болн сурһульчнр байсв. Байрта йовдлын йовудт учрсн концертд министрин дарук Саңҗрһа Германас нань Элст балһсна һардврин толһачин дарук Дмитрий Довгополов, хотл балһсна һардврин сойлын болн зуульчллһна заллтын ахлач Эрднин Данзн, негдгч тойгта билг-эрдмин сурһулин һардач Цеднә Герльтя орлцв. Көгҗмин шин зевсгүд сурһульчнрт икәр таасгдв. Тиигәд эн сурһулин бүрдәцд шин җилин өмн ик байрта йовдл учрв. Иргчдән сойлын халхар көдлх сән медрлтә мергҗлтнриг белдхд тернь йир туста болҗана.
ҖИРҺЛИН Кермн