Хальмг бичәчин шин дегтр

Санкт-Петербургд хальмг бичәч Шовуна Евгенийин шин дегтр шидр барас һарв. Эн җил түрүн үүдәврәрн умшачнрин оньг авлсн бичәч хойрдгч дегтрән барлв. Тернь «Четыре» гидг нертә дегтр һарһач барлсн «Шулма» гидг дегтр болҗана.

Хамгин түрүнд дегтрин нерн әмтиг соньмсулҗана. Бичәчин түрүн үүдәвр утх-зокъялын шалһачнрин болн бичәчнрин оньгас алдрсн уга. Энүнә түрүн дегтр «Җилин бичәч» гидг утх-зокъялын мөрән лауреат болсмн. «Үнндән болсн йовдлмуд» гидг әңгд хальмг бичәчин үүдәвр мөрәлгдсмн.
Шин дегтрин үүлдвр бичкн нег балһснд давҗана. Әмтн оларн бәәдг герт кесг тоот учрв. Әмтнәс юуһарн чигн йилһрдго эңгин залус тенд бәәсмн. Көдлмшәс сул цагтан футбол хәләһәд, пиив ууһад, заһс аңнад, юунд чигн орлцлго бәәсмн. Тиим төвшүн бәәдл генткн эвдрв. Эднлә хоша бәәсн күүкд күн сальклад, альдаран одснь медгдлго бәәҗәһәд, нег дәкҗ таньдго гиичиг дахулҗ ирнә.
Тиигәд эвәрн дурндан бәәсн залус кезәнк шулмла харһад, терүнлә аврлт уга бәрлдәнд орсна тускар Шовуна Евгенийин шин үүдәврт келгдҗәнә.
Тууль-түүкд, улсин домгт келгддг шулмин цаг тиигәд бичәчин үүдәврт орман олснь умшачнриг соньмсулхнь маһд уга.

ҖИРҺЛИН Кермн