Насан утдуллһна мөргүлмүд

Зулын байрин өмн насан утдулдг авъяс хальмгудт бәәнә. Бурхн Багшин Алтн сүмд җил болһн нас утдуллһна мөргүлмүд болна. Эн җил Зулын байр Хальмгт бар сарин 25-д темдглгдхмн. Тогтсн авъясар нас утдуллһна мөргүлмүд амрлһна өдрмүдт болхмн.

Һурвн долан хонгин туршарт амрлһна өдрмүдт әмтн Бурхн Багшин Алтн сүмд ирҗ, насан утдуллһна мөргүлд орлцҗ чадҗана. Ут тоодан 6 тиим мөргүл болхмн. Тер мөргүлин йовудт хурлын гелңгүд болн насан утдулхар ирсн әмтн Амитаюс бурхнд, Ушнивиджая болн Цаһан Дәрк бурхнд мөргҗ зальврхмн.
Нас утдуллһна мөргүлмүд бар сарин 7-д эклҗәнә.
Бар сарин 7-д хурлд Цаһан Дәркд нерәдсн мөргүл болхмн.
Бар сарин 8-д Амтаюс бурхнд нерәдсн шаҗна йосрхл күцәгдхмн.
Бар сарин 14-д Ушнишавиджая бурхна ут наснд нерәдсн мөргүл болхмн.
Бар сарин 15-д Амитюс бурхна ут наснд нерәдсн мөргүл давхмн.
Бар сарин 21-д Цаһан Дәркин ут наснд нерәдсн мөргүлд оларн орлцҗ болхмн.
Бар сарин 22-т Амитаюс бурхна ут наснд күрхд туслх мөргүл болхмн.
Мөргүл болһн өрүн 9 часла эклҗәхмн. Нас утдуллһна мөргүлд әмтн цугтан насна дигин йилһвр угаһар орлцҗ чадҗана. Зуг Моһа, Һаха, Бар болн Мөчн җилтә улс эн мөргүлмүдт эрк биш орлцҗ үзх зөвтә. Номин хәәрн цугтад күртхнь маһд уга.
УШКАНА Сувсн