КТК шишлң көлг белглв

12-12-2024, 10:51 | Общество, Таңһчин зәңгс, Зіњг

Эн долан хонгин эклцәр «КТК-Р» акционерн ниицән буйнч седклин кергин медлд таңһчин бүрдәцсиг шишлң көлгн-күчәр теткв. Ут тоодан 40 сай арслң эн кергт олзлгдв. Әрәсән залврла залһлда бәрдг «КТК-Р» акционерн ниицәнә ик һардачин дарук Михаил Гришанков болн Хальмг Таңһчин залврин Ахлач Босхмҗин Гилән байрин керг-үүлдврт орлцад, таңһчин райодын болн сойлын бүрдәцст шин көлгнә түлкүр бәрүлҗ өгв.
Хар Һазра района дөрвн селәнә муниципальн бүрдәц, Ик Буурла района коммунальн цергллт, Элст балһсна ясврин-тосхлтын заллт, Н.Пальмовин нертә Келн-улсин музей шишлң көлгәр теткгдв. Тиигәд, Келн-улсин музейд белглсн шишлң көлгн деер үнтә зургудыг хол хаалһд зөөҗ болхмн. Тегәд музейин һардач Мучан Иринан темдглсәр, ода эдн эднә көрңд хадһлгдҗадг үүдәврмүдиг таңһчин райодт бәәтхә, орн-нутгин талдан регионмудт олн зүсн һәәхүлд авч одад, олна оньгт тусхаҗ чадхмн. Ирина Ивановна КТК-Р-ин болн таңһчин һардврт ханлтан өргв. Темдглхәс, КТК таңһчин сойлын бүрдәцсиг дөңнҗ, шишлң көлгәр теткнә. Сүл җилмүдт «Өөрднр» бииһин театр, «Бамб цецг» дууна болн бииһин ансамбль, Келн-улсин театр, Манҗин Аркадин нертә шаңһа филармонь эврә көлгтә болв.
Хальмг Таңһчин залврин Ахлач Босхмҗин Гилән КТК-н һардач Николай Горбань таңһчд болн бәәрн әмтнд килмҗән тусхадг төләднь ик ханлтан өргҗ, җил ирвәс буйнч седклин медлд йилһгддг мөңгнә кемҗән өсәд йовхиг темдглв. «Эн җил КТК таңһчин муниципальн бүрдәцст дөңгән күргҗ, жилищн-коммунальн эдл-ахун бүрдәцсиг шишлң техникәр теткв, эннь балһснд сән кец-таал тогталһнд туслна. Дорас өсч йовдг бичкдүдт ниицән онц оньг тусхаҗ, эднә билг-эрдм делгрүллһнд, төрскн һазр-усндан эңкр болх сурһмҗ өглһнд баһ биш мөңг йилһнә. КТК мана таңһчин итклтә үр болна», гиҗ Гилән Герасимовна келв.
Эн җилин эклцәр акционерн ниицәнә һардвр шишлң көлг өдгә цага кергсл хулдҗ авлһнд 100 сай арслң йилһҗ өгв. Эн зунар ниицән буйнч седклин кергүд күцәлһнд немр 54 сай арслң йилһсн билә. 2023 җилд буйнч седклин кергин төсвс күцәлһнд 130 сай арслң йилһгдсн болхла, эн җил ут тоодан 157 сай арслң эн кергт һарһгдв. «КТК – 1-ч класст орҗадг сурһульчнрт», «КТК – билгтә бичкдүдт», «Төрскн һазриннь йиртмҗ хадһлый» гидг буйнч седклин кергүд сән авъяст тохрв. Одахн «КТК – билгтә бичкдүдт» наадмин дииләчнр Москва балһснд «Орс дун» гидг академическ театрин тәәз деер билг-эрдмән үзүлҗ, орн-нутгин дөрвн региона уйн наста дуучнр-биичнрлә хамдан байрин ик концертд орлцв.
«КТК-Р» акционерн ниицәнә Әрәсән залврла залһлда бәрдг ик һардачин дарук Михаил Гришанковин темдглсәр, эдн таңһчин һардврла хамгин чинртә төрмүд йилһҗ авч, тедниг хаһлхар шунна. «Мана ниицән Хальмг Таңһчла олн халхар нөкцҗ үүлднә. Хамгин түрүнд бидн бәәрн улсин җирһл ясрулхар зүткнәвидн. Тиигәд, эрүл-менд харлһна, сурһуль-эрдмин, спортын, социальн халхар олн зүсн төсвс күцәнәвидн. Эн җил амр биш болв, тер бийнь бидн зуралсн тоотан күцәҗ чадвидн», – гиҗ Михаил Гришанков темдглв.

ДООҖАН Наталья
ЗУРГТ: шишлң көлгнә түлкүр бәрүлҗ өгв

Видео