Москвад КТК-н концертд орлцв

«КТК – билгтә бичкдүдт» гидг марһана дииләчнрин концертд хальмг билгтә бичкдүд орлцв.

«Русская песня» гидг Московск государственн академическ театрт бичкдүдин болн уйн баһчудын билг-эрдмин нарт-делкән марһана гала-концерт болсмн. КТК-н буйнч седклин көтлврин билгтә бичкдүд болн баһчуд оларн орлцдг сәәхн керг-үүлдврин ашлгч девсңгнь байрин бәәдлд давв.
Эврәннь таңһчдан билг-эрдмән сәәнәр үзүлсн хальмг күүкд-көвүд гала-концертд өргмҗин седклтәһәр билгән үзүлв. Байрин эн үүлдврт күндтә гиич болҗ Хальмг Таңһчин залврин ахлач Гиляна Босхомджиева орлцв.
Концертд орлцачнрт нерәдҗ келсн үгдән Хальмгин премьер-министр таңһчин һардврин нерн деерәс Каспийск трубопроводн консорциумд ханлтан медүлв. Олн җилин туршарт КТК Хальмг Таңһчла залһлда бәрәд, таңһчин билгтә бичкдүдиг дөңнлһнд ик тусан күргҗәхинь темдгләд, Гиляна Босхмджиева региона социальн-экономическ делгрлтд консорциум орулҗах тәвцинь зааһад, КТК-н генеральн директор Николай Горбаньд ханлтан өргв. «Билг-эрдмин иим ик чинртә байрт орлцлһн бичкн билгтнрт мартгдшго йовдл болҗана», – гиҗ Гиляна Бохомджиева цуг орлцачнрт үүдәгч күцәмҗ дурдв.
«КТК – билгтә бичкдүдт» гидг фестиваль нарт-делкән чинр зүүһәд, олн келн-улсин иньгллтин ул болҗ, бичкдүд дунд тааслт олҗана. 2024 җилд эн марһана региональн девсңд орлцхар 433 эрлһн орҗ ирсмн. Элстин тәәз деер билгән үзүләд, мастер-классмудт орлцад, хамгин сәәнәр эрдмән үзүлсн орлцачнр йилһҗ авгдсмн.
Аштнь, 43 билгтнр Москвад Хальмгин нерн деерәс билгән үзүлв. Элст балһсна хойрдгч тойгта бичкдүдин билг-эрдмин сурһулин сурһульч Заяна Джембеева. Марһанд күүкиг багш Гиляна Эрдни-Горяева белдсмн. Хар Һазрин РМО-н сойлын болн амрлһна цагин цутхлңгин нерн деерәс Валерия Алаева орлцв. Багш Алла Эректеева марһанд күүкиг белдв. Ик Буурла района Зундинск дундын сурһулин сурһульч Эрдем Мучкаев багш Светлана Мучкаеван һардврт билг-эрдмән делгрүлсмн. Эн района Э. Чоноскаевин нертә Оргакинск дундын сурһульд сурдг билгтә күүкн Тамара Оголова марһанд орлцв. Багш Иляна Боваева күүкиг марһанд белдв.
Марһанд орлцсн коллективсин нердиг заах кергтә. Багш Ксения Багутова һарддг «Иньг мини» коллектив, Элст балһсна негдгч тойгта бичкдүдин билг-эрдмин сурһулин «Алтн булг» гидг дууна баг Наталья Дукманован һардврт марһанд билг-эрдмән үзүлв.
«Лидерленд» гидг театральн студин орлцач Марьям Бондаренко гала-концертд бас орлцв. Багш Валерия Цыбинан һардврт күүкн эн марһанд белдсн билә.
Тиигәд дууна болн билг-эрдмин нань чигн янзар эврә билг-эрдмән хальмг бичкдүд үзүлҗ чадв. «КТК – билтә бичкдүдт» гидг байрин ик керг-үүлдвр 2024 җилин үкр сарин 29-с авн бар сарин 3 күртл болв. «Москва үүрмүдән тосчана» гидг дуудвртаһар нарт-делкән марһан давв.
Форумин йовудт гала-концертас нань мастер-классмуд, экскурьсмуд кегдв. Билгтә бичкдүд нертә олн артистнрла харһв, тоомсрта сурһулин мергҗлттә багшнрин дамшлтла таньлдв. Әрәсән болн талдан һазрас ирсн билтнрлә хальмг баһчуд таньлдв. Эвин бәәдл болн иньгллтин ул тиигҗ тәвгднә.
ҖИРҺЛИН Кермн