Цагин эргц җирһлинь кеерүләд

Кен-негнәннь бәәдл-җирһлд баһ цагтнь үүдсн үр-иньглгч залһлдан насн ирх дутм геедрх бәәтхә нам җил ирвәс батрад-делгрәд йовдгнь нуувч биш. Зәрм улсин төлә үр- дүңгнь нам элгн-саднлань әдлхн өөрхн улс чигн болҗ тоолгдна биший. Шидр мана редакцин хайгар «Хальмг үннә» умшачнр Онтан Роза, Мацка Алла болн Бадендән Галина бичгән илгәҗ, эврә өөрхн нәәҗән йөрәх седклән медүлв:
- Шин җилин туула сарин 7-д мана үр күүкн Рита Борисовна Мишкевич ончта өөнән темдглв. Байрин нәәрт энүнә хайгар бүлән,ханмҗта кесг үгмүд келгдснь орта болв, юңгад гихлә мана нәәҗ цуг насни турштан сурһуль-эрдмин халхар көдлҗ, кесг үй сурһульчнрт бат медрл зааҗ, җирһлин сарул-сәәхн хаалһднь орулсн болдг.Эн байрла ирлцҗ, туслң мана бәәдл-җирһлд тәвн шаху җил хооран учрсн йовдлмуд бас генткн сергәгдҗ үүмүләд авв.
Давсн зун җилин далдгч җилмүдин эклц,бидн, арвн классан төгсәсн таңһчин селәдәр бәәдг баахн күүкд-көвүд, Элстд ирҗ, тиигхд үүлдҗәсн багшнрин училищд шүүвр өгәд орвидн. Тер цагт эн сурһулин бүрдәцд көдлҗәсн хальмг келнә багш Кензән Санҗ мадниг бүләнәр,эцкинәр тосч авснь нег үлү мартгдхш. Шинкн балһснд ирсн баахн оютнрт түрүн авгтан зөвәр җаңһрта болад бәәв. Негдвәр, урднь эк-эцкин гертәс холд эс һарчасн маднд гертксән санад уйдх чигн саам учрв. Хойрдвар болхла,мадна зәрмнь,нег үлү Аһшин мүҗәс ирсн баһчуд, хальмг келән тас меддго бәәсмн,тегәд сурһулин көтлвр күцәхд басл дашката болв.
Эн кемд кен-негнднь үр-дүңгин дөң-түшг кергтә болснь лавта. Бидн болхла дөрвүлн училищд орҗ экләд сурснас авн нег-негнәннь үг медҗ, хоорндан үүрлдг болвидн. Тиигхд дала-нала гисн юмн уга кемд нег үлү нег-негән дөңнәд,бәәсәрн хувалцад эн-тер уга бәәләвидн. Юуһинь нуухв,зәрмдән гертәсмдн өгүлдг баһ- бичкн мөңгн сара хонгт чигн күрлго чиләд ирхлә,үүрмүд нөкд болдг бәәсмн. Тегәд яһдг-кегдг болв чигн оютнрин цаг басл һәәвһә, байрта- бахта, сән-сәәхн цаг болҗ ода күртл сәәнәр тодлгдна.
Багшнрин училищин хөөн бидн,баахн мергҗлтнр,таңһчин селәд-фермсәр тарад, күч-көлсч хаалһан эклсн болдг. Һундхас, цаг ирвәс зәрмнь тас талдан эрдмәр көдлдг болв,наадкснь болхла багшин халхар цааранднь ик сурһульд орҗ сурв. Мана үр күүкн Рита Борисовна болхла,цуг насни турштан тууҗин багшар көдләд, өөдән кесг ачлвр авад,нерән һарһв.Келхд, Элстд билгтә бичкдүдин төв шинкн секгдҗәсн саамд ик дамшлтта,гүн медрлтә багшиг тиигәрән көдлмшт дуудв. Кедү күүкдиг чадмгар сурһҗ,үнн-чик заавр эн өгсн болх гинәт! Зуг өрк-бүлин учрар хөрн һар җил хооран көдлмшин орман сольсн бийнь ода күртл энүнә сурһульчнр багшан бүләнәр тодлҗ, күргсн ач- тусинь өөдәнәр үнлҗ магтна. Эднә зәрмнь болхла өдгә цагт Әрәсән ик балһсдт, Элстд чигн өөдән үүл дааҗ йовна, багшин заавр җирһлднь туста болсиг темдгләд,харһх болһндан зүркни ханлтан өргнә.
Хойр зуудгч җилмүдин эклцәр мана үр күүкн Москва тал һарч йовад,шин бәәрндән чигн олнд үлгүр-үзмҗ болҗ көдлсмн. Тиигчкәд даңгин үүдәгч кевәр үүлддг багш мана хотлд чигн өдгә цагин эв-арһс олзлҗ көдләд, сәәнд үзгдв. Келхд, эмнлһнә колледжд сурчадг энүнә оютнр Москван сурһулин бүрдәцсин дунд болсн марһаст орлцад,нүүрлгч ормс эзләд, багшиннь нерән туурулснь бахмҗта. Нег үлү эдн ода Хальмг Таңһч альд бәәршлҗәхинь, Европд хамгин ик гисн шар шаҗна хурл Элстд босхгдсинь кенәс чигн сәәнәр меднә, гиҗ Рита Борисовна бийнь шоглҗ келнә. Энүнә өрчиг кеерүлҗәдг шин ачлврмуднь бас күцәмҗтә көдлмшин тодрха ашнь болҗана гих кергтә. Тегәд чигн өөнин байр угтҗ, Рита Борисовнан хайгар йөрәлин бичгүд аль һазрас эс ирв гинәт!..
Тәвн шаху җилдән бидн нег-негнәннь өрк-бүлин төрмүдтнь орлцҗ, эврә үрдән кү кеһәд,ода ачнр-зеенрән, нам җичнрән чигн эңкрлҗ өскчәдг ээҗнр-аавнр болвидн. Тиигсн бийнь урдк кевәрн хоорндан үүрлҗ, байр-зовлңгарн хувалцҗ,эндрк амр биш цагиг хамдан дааҗ һархар зүткнәвидн. Тегәд эврә төрскн газетәр дамҗад, дәкн нег эврә үр-дүңгән ончта өөнләнь йөрәҗәнәвидн, цааранднь чигн олн җилдән урмдтаһар багшлҗ,эрүл- дорул бәәх болтха!

Зургт: Рита Мишкевич (зүн таласнь хойрдгчнь) үр күүкдтәһән