Цаган сергмҗтәһәр давулв

Шин җилин амрлһна өдрмүдт тогтсн авъясар, Элстд «Ойрат-Арена» төвд «Хальмг Таңһчин Толһачин һацур» нертә нәр-наадн болв. Басңга Баатрин нертә Келн-улсин театрин артистнр байриг чадмгар давулв. «Киитн Аавиг харслһн» нертә наадын йовудт нәр болв.
Сурһулян йилһән сәәнәр сурдг көвүд-күүкд, спортын халхар күцәмҗ бәрсн арвтнр, олн үртә өрк-бүлмүдин болн СВО-д орлцачнрин үрд нааран ирх зөв авсмн. Тер мет Луганск Улсин Республикин Антрацитовск районас ирсн бичкдүд нәр-нааднд бас орлцв. Цуг бичкдүдт әмтәхн белгүд өгв.
– Таңһчин Толһачин Шин җилин һацур дорас өсч йовдг бичкдүдт сурһулян сәәнәр сурхд, цаарандан ик күцәмҗ бәрхд урмд өгнә. Мана үрдиг даңгин байрлулҗ, теднә күсл күцхд бидн цуһар тәвцән орулх зөвтәвидн, – гиҗ Хаска Бату темдглв.
ОЛЬДАН Цаһан