Моһа җил юуһарн ончта болх

Вчера, 16:35 | Общество, Таңһчин зәңгс, Зіњг

Моһа җил гисн тасрхан уга сольгдад бәәдгәрн йилһрнә. Энүнә күчнь болн ухань тер дарунь медгдхш. Шулун-шудрмг болсн деерән ямаран чигн бичкн юмиг оньгасн алддго әмтнд Моһа җилин туршарт дөң болҗахмн. Бий деерән даавр авхдан дурго улст немр күнд тоот үүдәһәд, Моһа саалтг чигн болад бәәхмн.
Җил болһнар 2025 җил ямаран болхинь шинҗләд хәләхмн.

Хулһн җилтә улс: 1948, 1960, 1972, 1984, 1996, 2008, 2020
Эн җилтә әмтнд орҗасн җил олн төрмүд тәвҗәнә. Тиигчкәд тедниг хооран саалго күцәх кергтә. Көдлмшин халхар шин хаалһ чигн секгдх. Толһачнр тана көдлмшиг зөвтәһәр үнлх, хамдан көдлҗәдг әмтн дөңгән күргх.
Өрк-бүлдән ниитәһәр бәәҗ үзтн, юңгад гихлә керүл-цүүгән чигн һарад бәәдг, теслт һарһҗ үзтн. Һанцарн бәәх улст зунын цагла байрта йовдл учрҗ, җирһлднь хүврлт орулхмн.

Үкр җилтә улс: 1949, 1961, 1973, 1985, 1997, 2009, 2021
Үкр җилтә әмтнә җирһлд дала сольвр оршго. Эднә тохнята, төвшүн җирһл тер кевәрн бәәхмн. Болв көдлмшин халхарн өөдлх саната болхла шунмһа кевәр үүлдх кергтә. Өрк-бүлдән оньган икдүләд, күүкд-көвүдтәһән давулҗах цаган икдүлсн цагт хәрлцән батрад бәәхмн. Һанцарн бәәдг әмтн зуульчлһнд йовхларн, әмтн олар хурдг һазрт болдг керг-үүлдврт орлцхла, седклдән ирлцх үр-иньгтә харһхмн.
Мөңгнә туст эднд әәх юмн уга. Болв чигн мөңгән тоолвр угаһар һарһхасн саглтн. Эрүл-мендин туст килмҗән һарһад, цагларн эмчд одад, кергтә эмнлһ авчахла, сән болхмн. Сул цаг учрхла уснд күрч өөмәд, эс гиҗ йога эв-арһар дамшад оньган өгтн. Тиигәд эрүл-мендән батлҗ чадҗанат.

Бар җилтә улс: 1950, 1962, 1974, 1986, 1998, 2010, 2022
Бар җилтә улс 2025 җилд олн шүүврлә харһхмн. Удан болзгта керг-үүлдврмүд күцәлһнд цаган нерәдтн. Адһм угаһар ухалад, теслт һарһҗ үүлдхлә көдлмшт чигн, өрк-бүлд чигн бәәдл ниитә болн күцәмҗтә болхмн. Җилин туршарт көдлмш икдәд бәәхмн, сәәнәр көдлдгән тасрхан уга медүләд бәәх кергтә болҗана. Һардачнр неквртә болв чигн тана көдлмшиг чик кевәр үнлхмн. Тер учрар икәр зовад бәәхмн биш. Бийдән иткәд, седвәр һарһҗ үүлдхлә, көдлмшәрн өөдләд чигн бәәхит.
Өрк-бүлдән хоорндан ниитә бәәтн. Һанцарн бәәдг әмтнә өөдән неквртнь ирлцх күн чигн харһад бәәх. Зуг тоолвртаһар үүлдтн. Мөңгнә туст чигн бәәдл бас төвшүн болхмн. Зуг тоолвртаһар, болх-болшго хулд келго, мөңгән тоолвртаһар һарһҗ бәәхлә, сән болхмн. Эрүл-мендән батлад, цуг күнд тоотыг давҗ һарч болхмн. Хотан дигтәһәр, эвәрн эдләд, бийән чаңһаһад, цогцан батлад бәәхлә, җил төвшүн кевәр давхмн.

Туула җилтә улс: 1951, 1963, 1975, 1987, 1999, 2011, 2023
Эн җилтә әмтн бийән сәәнәр хәләх зөвтә. Эрүл-мендән батлад, сурһульдан болн өөрән бәәдг әмтнлә хәрлцхд оньган өгх кергтә. Учрсн цуг төрмүд хаһллһнд болн эврә бийин чидлән дигтәһәр олзллһнд Моһа эднд дөң болх.
Моһа җил эврә күчн-чидлән болн чадмган шинҗлҗ дигллһнд болн үүлдврән ясруллһнд туста болхмн. Түргәр юмиг хүврүлхәр бичә адһтн. Ода кеҗәх кергтән оньган өгтн. Туула җилтә әмтн мергҗлтән өөдлүлх саната бәәсн болхла, Моһа эднд дөңгән күргхмн.
Өрк-бүлдән ниитәһәр бәәхлә, альднь чигн бәәдл төвшүн болн дигтә болхмн. Намрин сармудт һанц бәәдг әмтн шин харһлтст оньган өгх зөвтә.
Мөңгнә туст бәәдл тер кевәрн. Болх-болшго юмнд мөңгән һарһдган ууртн. Хаврин цаг мөңгән хоршалһнд туста болхмн.
Эрүл-мендән батллһн – тана һол төр болҗана. Көл-һаран көндәһәд, цевр аһар кииләд һаза йовһар йовад бәәхлә, тана бәәдл зөвәр ясрхнь маһд уга.

Лу җилтә улс: 1952, 1964, 1976, 1988, 2000, 2012
Эн җилд Лу җилтә әмтн өөдән күсл тәвҗ зөрх зөвтә. Хүврлтәс әәдго улст эн җил йир күцәмҗтә болх. Көдлмшт, өрк-бүлд болн мөңгнә туст Моһа җил эднд ик олзта болхмн.
Нег мөслгч хүврлтсин цагт Моһа таднд чидл болн зөрмг үүдәҗ, ямаран чигн төр хаһлҗ болх арһ өгхмн. Һардвр тана шунлтыг үзхмн, хамдан көдлҗәдг үүрмүд шин төсвитн дөңнхмн. Шин керг кех седкл бәәхлә, энтн йир сән цаг болҗана.
Лу җилтә әмтн даңгин улсин оньгт бәәнә. Хамдан зуульчлад, эс гиҗ шин кергиг хамдан күцәһәд, өрк-бүлдән ниитә бәәдлиг батлх таал учрна. Һанцар бәәдгнь харһлтсас хооран һархмн биш, тана хөв-кишгт орлцх күн өөртн чигн йовдг болх.
Сурһуль-эрдмд һарһсн мөңгн олзта болх. Болв чигн җилин түрүн өрәлд тоолвр угаһар мөңгән бичә һарһтн.
Эрүл-мендин туст зовх юмн уга. Болв көдлмшән болн амрлһна цаган дигтәһәр давулҗах кергтә. Цагларн амрад, көл-һаран батрулад бәәхлә, цогц-махмуд амрхмн, күн муурлго көдлмшән кедг таал тогтна.

Моһа җилтә улс: 1953, 1965, 1977, 1989, 2001, 2013
Моһа җилтә улсин цагнь ирсн болҗана. Эднд күцәмҗтә җилд цугинь күцәхәр эдн шунх зөвтә.
Зөргтәһәр үүлдхлә, көдлмшин халхар өөдлҗ чадҗанат. Нөкцҗ үүлдхин туск үрвр чигн таднд кегдх. Шин керг секх саната бәәсн болхла, эрк биш сансан күцәҗ үзтн. Цугнь таднд туслҗана.
Өрк-бүлдән сән таал тогтах цаг ирв. Һанцарн бәәхнь соньн олн улсла таньлдҗ чадҗана.
Көдлмш икдсн бийнь эврә эрүл-мендин тускар мартхмн биш. Цагларн амрад, шимтә сән хот ууһад, спортд цаг олад бәәхлә, җирһл йир дүүрң болн сән болхмн.

Мөрн җилтә улс: 1954, 1966, 1978, 1990, 2002, 2014
Мөрн җилтә улст сән цаг учрҗана. Көдлмшин халхар йир күцәмҗтә җил болхмн. Шин олн харһлт тадниг күләҗәнә. Мөңгнә туст чигн зовх юмн уга. Учрҗах цуг сән таалыг олзлҗ үзтн.
Көдлмштән шунмһа кевәр үүлдәд, уралан зөрх таал таднд учрҗана. Тана шин төсвс болн седвәрмүд тааслт олхмн. Тедниг күцәлһнд күчн-чидлән зөрүлсн цагт күцәмҗ эрк биш ирх. Чинртә кергиг хооран саалго шунҗ көдлтн.
Мөрн җилтә улст соньн олн харһлтс учрҗана. Өрк-бүлтәһән хамдан сул цаган давулад, зуульчлад хәрлцәһән батлхмн. Һанц улсин арһнь бийсиннь һарт бәәнә. Олн күүнлә эдн харһхмн, зуг невчк эс шамдхла, җирһлдтн орлцх күүг оньгасн алдад чигн бәәхит.
Дала һару һарһлго, әрвнәр бәәхлә, бәәхтә бәәдлтн мууршго. Таниг шаңнад, мөңгнә ору чигн орҗ ирәд бәәхмн.
Цагларн амрад, нөөрән татлго, эрүл-мендән батлҗ бәәхлә, ямаран чигн кергиг тадн күцәҗ чадхит.

Хөн җилтә улс: 1955, 1967, 1979, 1991, 2003, 2015
Амрх, чидл-чинәһән батлҗ авх цаг Хөн җилтә улст ирҗәнә. Бий тустан килмҗ һарһҗ, сансн тоотан күцәх, дурарн бәәх әвртә цаг. Йиртмҗин ямаран чигн цагла кеер һарад, амрлһна цаган давулад бәәхлә, серглң-дерглң бәәхит.
Көдлмшт дала хүврлтс учршго. Тегәд чадмган улм ясрулх, мергҗлтән өөдлүлх цаг ирсн бәәнә. Хамдан амрад, нег-негнәннь көдлмшәр соньмсад, өрк-бүлдән ниитә бәәдлиг батлх таал тогтҗана. Олн үүрмүд дунд цаган давулад, һанцар бәәдг әмтн эврә таңһрган олх арһта болҗана.
Бәәхтә бәәдлтн зөвәр бат, болв чигн мөңгән хоршулх арһ хәәтн. Хаврар генткн немр мөңгн орҗ ирәд бәәх.
Эрүл-мендән батлхд цевр аһар киилҗ, йовһар йовлһн туслхмн. Цагларн эмчд одад бәәхлә, ямаран чигн гемәс бийән эртәснь саглҗ болхмн.

Мөчн җилтә улс: 1956, 1968, 1980, 1992, 2004, 2016
Көдлмшин халхар эн җил йир күцәмҗтә болхмн. Мөңгнә ору баһршго, шин төсвс чигн күцәмҗтә болх. Шамдһа кевәр үүлдәд, цугинь күцәҗ чадҗанат, цугнь тана һарт бәәнә.
Әмтиг һардҗ чаддган үзүләд, үүрмүд дундан тааслт олхит. Сурһуль-эрдмин халхар көдлҗәх Мөчн җилтә улст җил нег үлү сән болхмн. Мергҗлтән өөдлүллһнд болн шин медрл дасч авлһнд җил йир туста болҗана.
Эднә йирин җирһлнь йир соньн болн дүүрң болхмн. Өрк-бүлтә әмтн эднә хәрлцәнд һарчасн тоотан уурулҗ, ни кевәр бәәхмн. Соньн олн күүнлә харһх таал һанцар бәәдг улст учрхмн. Болв чигн бичә адһтн, ухаһан туңһаһад, шинҗләд хәләтн. Мөңгән әрвнәр олзлат, ик хулд кех мөңг хоршаҗ чадхит. Эрүл-мендән батллһнд килмҗән өгтн. Хуучн өвчән эс гиҗ нань чигн гемән цаглань эмнҗ үзтн.
Така җилтә улс: 1957, 1969, 1981, 1993, 2005, 2017
Эн җилтә әмтнд 2025 җил шунмһаһар үүлдх цаг болҗана. Көдлмштән оньган икдүләд, өрк-бүлин туст килмҗ һарһҗ үүлдх кергтә. Күнд тоотыг дааҗ һарад, күслән күцхд Моһа дөңгән күргх.
Тадна өмн олн төр һарч ирхмн. Болв тедниг арднь орад күцәҗ чадхит. Һардачнр тана шунлтыг үнлх, көдлмшч үүрмүдтән үлгүр болхит. Шин көдлмшт орх седкл бәәхлә, хаврар тер санаһан күцәҗ чадҗанат. Өрк-бүлтн тадниг дөңнх, өөрхн улстан килмҗән өгтн. Үүрмүдин дөңгәр эс гиҗ олна үүлдврт орлцад, һанцар бәәдг улс таңһрган олхмн болҗана. Спортын төлә цаг олад, нөөртән цагларн орад, тадн даңгин эрүл-менд йовхит. Хотан татҗ идәд, шарсн болн дала өөктә хот баһар идхлә бийд, цогцд туста болх.
Ноха җилтә улс: 1958, 1970, 1982, 1994, 2006, 2018
Ноха җилтә улс цуг күчн-чидлән, чадмган һарһҗ үүлдх цаг ирсн бәәнә. Шин тоотыг арднь орҗ дасад, чадмган күцц кевәр олзлҗ үзтн. Зүткәд бәәхлә, күцәмҗ эрк биш ирхмн. Даалһвран сәәнәр күцәдг күн болҗахан медүлҗ көдләд, күндллһ олхит. Ах үүрмүдәс кесг тоотынь дасч авх таал учрхмн. Мергҗлтән өөдлүлхд таалта цаг.
Өөрхн улсин санан-седклинь медҗ ниитә бәәхлә, өрк-бүлин хәрлцән сән болхмн. Гертән суулго шин улсла таньлдад бәәхлә, һанцар бәәдг әмтн җилин эклцәр седклднь ирлцсн күүнлә харһхмн болҗана. Мөңгнә туст әәх юмн уга, болв чигн дала ик ору орх гиҗ нәәлхмн биш. Мөңгән хоршаҗ үзтн. Хаврар эс гиҗ намрар мөрә чигн таднд учрад бәәх.
Болх-болшго юмар зовлң кедгән уурад, цогц-махмудан батлад, цагларн амрад бәәхлә, ямаран чигн кергиг амрар күцәҗ чадхит.
Һаха җилтә улс: 1959, 1971, 1983, 1995, 2007, 2019
Сансарн бәәһәд, җирһлдән хүврлт орулх цаг Һаха җилтә әмтнд учрҗана. Моһа җил эднд мөңгнә туст сән таал болн медрлән, эрдмән делгрүлхд туслх таал өгчәнә. Зөргтәһәр үүлдәд, көдлмшин туст өөдлҗ чадҗанат. Шин тоотас, хүврлт учрхас әәхмн биш.
Өрк-бүлтә әмтнә җирһлд сән хүврлтс учрад бәәхмн. Һанцар бәәдг әмтн невчк шамдад, кергәрн йовсн цагт, эс гиҗ зуульчллһнд һарсн цагтан өөрхн иньгән олад чигн бәәхит. Эрүл-мендин бәәдлән, цогц-махмудан батлад бәәхлә, җил му бишәр давхмн.
Барт белдснь УШКАНА Сувсн

Видео