Элст балһсан сулдхсн бичәч

Мана Элст балһсна 4-ч тойгта сурһульд хальмг олн-әмтнә бичәч, Төрскән харсгч Алдр дәәнә ветеран Җимбин Андрейла олн харһлт урднь болла. Юңгад гихлә энд бичәчин ачнр сурч йовла, ода җичнрнь сурчана.

Бичәчин 90 җилин болн Алдр Диилврин 70 җилин өөнд нерәдгдсн утх-зокъялын харһлт йир соньнар давсиг тодлнавидн. Энүнд хальмг улсин шүлгч, «Улан зала» мөрән лауреат Григорий Кукарека бас орлцла. Җимбин Андрей дәәнд орлцсна, яһҗ шүлг бичдгин, эврәннь дегтрмүдин тускар келҗ өглә. Григорий Кукарека «Ветеран» гидг шүлг умшла. Эн шүлгән Җимбин Андрейла әдл әмтнд нерәдҗ бичснә тускар эн келлә. Мана сурһульчнр соньмсч бичәчнриг соңсад, олн сурврмуд өгч, келсинь бийдән шингәҗ авсмн. Багш Чимдә Байрта соньн видеозурц белдҗ, олна оньгт тусхав.
Нертә шүлгч болн бичәч Җимбин Андрейин 100 җилин өөнд нерәдҗ, таңһчд «Җимбин Андрейин үүдәврмүд умшчанавидн» гидг утх-зокъялын флешмоб болв. Мана сурһульчнр терүнд шунмһаһар орлцсиг темдглх кергтә. Сурһульчнр шүлгчин үүдәврмүд айслулҗ умшв. Багш Бимбрә Светлана болн Цеднә Байрта 6-ч «а», 7-ч «а» болн 10-ч классмудт Җимбин Андрейин түүкләнәс тасрхас умшҗ, бичәчин үүдәлтин тускар хоорндан күүндв.
Амр-Санана нертә дегтрин саңгин көдләч Түрвән Светланала хамдан 5-ч «а» класст утх-зокъялын кичәл давулвидн. Чүрүмә Дарина, Мухлан Мазан, Антона Вика, Бурһсна Маша, Лиджан Алдр, Цатхлңга Алдр «Төрскн минь», «Хаврин цагт теегм»,»Җирһлин дееҗ», «Килмҗин хәрү», «Түрүн цасн», «Сәәхлә» гидг шүлгүдиг сәәнәр айслулҗ умшв. Керг-үүлдвриг ашлҗ би «Элст балһсан сулдхсн бичәчд» гисн эврә шүлгән умшув.

НИМӘН Тамара, Элст балһсна 4-ч тойгта сурһулин хальмг келнә багш