Москван циркд занмуд белглв

Мьянма Республик Әрәсәлә иньгллтин залһлда батрулгдсна 75 җилин өөнд нерәдҗ Москван циркд зурһан зан белглв. Шидр тавн күүкн болн нег эр заниг мана орн-нутгур шишлң самолетар авч ирв.
Вернадскийин проспектд бәәдг Москван циркд седкүлчнрин төлә харһлт бүрдәҗ, хол һазрас ирсн аңгудыг үзүлв. Занмуд һурвн-дөрвн наста, эдниг циркд артистнр болхд белдхмн. Әрәсән МИД-ин зөвтә элч Мария Захарован темдглсәр, Мьянма Республикәс занмудыг мана орн-нутгур авч ирхин төлә хойр җилин эргцд кергтә бәрмт цаасд белдгдв, зөв авгдв. Келхд, аңгудыг нааран авч ирлһнә керг-үүлдврмүдиг Әрәсән һазадын керг-төрин министр Сергей Лавров бийнь һардв. Мьянма Республикәс мана орн-нутгур урднь чигн занмуд авч ирсн билә. Тиигәд, тавн җил хооран һурвн зан тендәс авч ирлә. Өөрхн иргчдән Мьянма Республик мана орн-нутгт дәкәд зурһан зан белглхәр бәәнә, тедниг Калужск мүҗд бәәдг түрүн сафари-паркд бәәлһхәр зуралҗана.
Занмудыг нааран авч ирхин төлә ИЛ-76 самолет йилһгдв, хаалһднь циркин һурвн мергҗлт болн малын эмч дахч йовв. Мьянмаһас ирсн мергҗлтнр ода чигн Москвад бәәнә, эдн занмудын бәәдлиг шинҗлҗ хәләҗәнә. Москван циркд занмудын орлцлһтаһар һәәхмҗтә наадн үзүлгднә, тегәд хол һазрас ирсн аңгуд иргчдән бас терүнд орлцдг болхмн. «Мьянма Республикәс ирсн мергҗлтнр маднд сүв-селвгән өгнә, аңгудт дарунь энд иҗлдҗ орс болн англь келәр өгсн даалһврмудыг күцәхд дөңгән күргҗәнә. Мана орн-нутгт ода ут тоодан хөрн шаху зан бәәнә», – гиҗ нертә артист Эдгард Запашный темдглв.

ДООҖАН Наталья