Оюни ик хургиг тосад

Эн җил Элстд шар шаҗна нарт–делкән хург болхмн. Делкән ик чинртә йовдлд эртәснь белдвр кегдҗәнә. Әрәсән президент Владимир Путин эн хургин чинринь темдглҗәхин тускар Хальмг Таңһчин Толһач Хаска Батула харһсн кемд ончлҗ заасмн. Делкән бурхн-шаҗна үүлдәчнр Элстд цуглрҗ ирх йовдлд цуг халхин белдвр кехин тускар Таңһчин Толһач Хаска Бату урднь келсмн.

Нарт-делкән хургт белдвр келһнә төрмүд бүрдәмҗин комитетин сүүрмүдт хәләгдҗәнә. Давсн җилин сүл өдрмүдт бүрдәмҗин комитетин дарани сүүриг Хальмг Таңһчин Толһач Хаска Бату һардҗ давулв. Бурхн-шаҗна сурһалиг делгрүллһнд, оюни сурһмҗин чинринь өөдлүллһнд хургин үүлдвр залгдхмн.
Бурхн-шаҗна үүлдәчнрин эн ик цуглранд белдәд, Элстин аэропортд шинрлт күцәгдхин тускар бидн урднь бичләвидн. Делкән кесг орн-нутгас ирх гиичнр аэропортын өөр босхгдсн суврһ үзхмн.
Будда-парк тосхгдхмн
Хальмгин хотл балһснд бурхн-шаҗна парк кегдх гиҗ зуралгдҗана. Бурхн Багшин номд шүтдг цуг улсин негдлтд, бурхн-шаҗна цуг зөрүллтсиг хамцулхд туслх күслтәһәр эн үүлдвр күцәгдҗәнә. Хургт орлцҗадг орн-нутг болһн сойлын болн оюни чинртә тоотан тер паркд орулхмн. Олн зүсн суврһн, хурлмуд, чонҗс, шаҗна чинртә нань чигн өвәрц тоот тер паркд орман олхмн.
Олн келн-улс хоорндк хәрлцәг ясруллһна төрәр ик цуглранд күүндвр болхмн. Эннь йир чинртә төр мөн. Нег үлү мана Әрәсә олн келн-улс ни-негн бәәдг алдр ик нутг болҗана. Әдл биш шаҗнд шүтдг әмтн бәәдг нутгт олн келн-улсиг ниицүллһнә төр даңгин һол оньгт бәәнә. Күмн әмтиг соньмсулҗадг цуг төрмүдәр хургт күүндвр болхмн.
Таңһчин Толһач Хаска Бату темдглсәр, белдврин йовудт хамгин түрүнд Элст балһсна бәәдлиг ясруллһнд ик оньг өггдҗәнә. Таңһчин әмтн терүгинь үзәд, эн седвәриг дөңнҗәнә. Талдан һазрин әмтнд үлгүр болх төсвс күцәх таал маднд бәәнә. Тиим нег төсвнь Будда-парк тосхлһн болҗана. Нер туурсн бурятск скульптор Даши Намдаковин үүдәврмүд паркин кеерүл болхин тускар таңһчин Толһач келв.
Бүрдәмҗин комитет батлгдв
Шар шаҗна нарт-делкән һурвдгч хургт белдлһнә бүрдәмҗин комитетин хань шин җил эклсн кемлә болсн сүүрт батлгдв. Бүрдәмҗин комитетиг Хальмг Таңһчин Толһач Хаска Бату толһалв. Орн-нутгин залврин кесг үүлдәчнр, нертә номтнр, шаҗна үүлдәчнр комитетин ханьд орв. Таңһчин залврин ахлач Босхмҗин Гилән болн министрмүд, Элст балһсна толһач Лиҗикә Алдр болн нань чигн дааврта көдләчнр хургт белдлһнд шунҗ орлцхмн. Комитетин ханьд орсн һардачнрин болн үүлдәчнрин нерд барт барлгдсн бәәнә. Хальмг Таңһчд болх шар шаҗна нарт-делкән хург белдлһнд Әрәсән Президентин һардвр, орн-нутгин һазадын кергүдин министерств ик килмҗән һарһҗана. Улсин хоорндк залһлданд, нарт-делкәд эвин бәәдл тогталһнд ик чинр зүүх делкән эн ик хург белдлһнд шар шаҗна сурһаль болн шинҗллтс келһнд туслдг саң, Росконгрессин саңгин, шаҗна олн үүлдәчнр болн номтнр зөвтә тәвцән орулҗ шунҗана.
Бурхн Багшин номин туг
Хальмг Таңһчин Толһач Хаска Батун зааврар таңһчд бәәдг шаҗнла залһлдата цуг тосхлтс шинрүлгдх зөвтә. Цуг эн кергиг муниципалитетмүд күцәхләрн, Хальмгин төв хурлла көдлмшән зүүцүлҗ күцәх зөвтәһинь таңһчин Толһач заав. Бадм цецгин суврһ аэропортд босхлһнд, Будда-парк белдҗ секлһнд болн нань чигн шин төсв күцәлһнд чигн Бату Сергеевич оньган тусхав.
Бурхн Багшин номд шүтдг ик орн-нутгудыг хамцулх таал учрҗана. Бурхн-шаҗна оюни күчиг күмни девшлтд залх һол төрмүдиг Хальмгт болх хург эрк биш хаһлхнь маһд уга. Өвкнрин җирһлин болн үүлдврин һол ул-сүүрнь бәәсн бурхн-шаҗна тугиг эндрк Хальмг Таңһчин иргнмүд өөдән өргх цаг ирв.

УШКАНА Сувсн