Олна күчәр керг бүтх

Шин 2025 җил Төрскән харсачин җил гиҗ Әрәсән Президент Владимир Путин зарлла, тегәд эн җил Төрскән харсгч Алдр дәәнә ветеранмудт, тылд көдлҗәсн мана аавнр-ээҗнрт, цергә керг-үүлдврт орлцҗадг баатрмудт болн теднә өрк-бүлмүдт һол оньг өггдх. СВО-д орлцҗадг дәәчнрт дөң күрглһнә керг бас чинрән геелго өргнәр күцәгдхмн.

Тиим дөң күрглһнә волонтерин үүлдврт Хальмг ик сурһулин цергә төвин курсантнр шунмһаһар орлцҗана. Түүнә тускар болн төвин өдгә цага бәәдл-җирһлин тускар эн бүрдәцин һардачин дарук, техникин номин кандидат, майор Абушинә Элвг келҗ өгв.
- Бидн СВО-д орлцачнрт хойр халхар дөңгән күргҗәнәвидн. Негдвәр, һаха сарин 1-әс авн, мана төв секгдснә хөөн бидн хальмг баатрмудын өрк-бүлмүдт дөң болҗанавидн. Хамгин түрүнд әмән өгсн дәәчнрин элгн-саднд дөң болҗалавидн. Тер тоод СВО-н һазрас эс ирсн дәәчнрин һанцарн үлдсн экнрт, авальмудтнь герин хаша-хаацинь цеврләд, хог-богинь кеер һарһҗ зөөһәд, үвлд белдлһнд дөң болҗанавидн. Волонтерин үүлдврт хамгин шунлттаһар курсантнр Авлан Александр, Кирилл Валендер, Очра Виталий болн нань чигн көвүд орлцҗана, – гиҗ Элвг Вячеславович мана күүндврин эклцәр темдглв.
Һардачин дарукин келсәр, тер мет эдн, «За наших-08» гидг буйнч седклин саңла нөкцлтнә. Саңгин талвң 6-ч тойгта микрорайонд бәәршлнә, цуг таңһчас әмтн цуглулсн дөң нааран ирнә, тер тоод хот-хол, хувц-хунр болн дәәлдәнә йовудт кергтә болдг нань чигн кесг юм авч ирнә, тер тоотыг төвин курсантнр дигтә-даратаһар йилһҗ авад, ораҗ өгәд, бачм аца ачлһнд дөң болна.
Бас тер саңгин талвңд курсантнр кү әәмшгәс далдлдг гөлм гүрнә, тиим кевәр долан хонг болһн 5-10 күн саңд көдлнә. Өрк-бүлмүдт дөң болдг бүрдәцсин эрлһәр бидн бас тиигәрән йовҗ дөң болнавидн, гиҗ Элвг Вячеславович келҗ өгв.
Хулһн сарла курсантнр эврә дурар донормуд болад цусан өгв, терүг олзлҗ шав авсн дәәчнрт болн йирин әмтнд дөң болна. Буйнч седклин талдан чигн керг-үүлдврт баһчуд орлцна. Үлгүрнь, эдн эрмдгтә бичкдүд дөң болна. Шин җилин байрин өмн эдн мөңг цуглулад, шалтгта күүкдт шикр-балта, зер-земш хулдҗ авад, белгән белглв.
Йирдән келхлә 2024 җилд Әрәсән 17 регионд, тер тоод Хальмг Таңһчд, цергә төвмүд секгдв. Бидн көрңгин салдсмудыг болн сержантнриг белднәвидн. Тиим кевәр оютн ик сурһульд эрдмән дассн деерән түүнлә дегц цергә эрдмәр дамшлт авна, инженерин цергт одҗ чадх. Тиигәд бакалавриатан төгсәсн деерән цергә белдврин туск шишлң цаас-цергә билет авна. Тиим кевәр энүнд әәрмд одад керг уга болна, гиҗ һардачин дарук цәәлһв.
Үлгүрнь, зөв-йос харлһна бүрдәцст цергә белдвртә көвүдиг хамгин түрүнд авна, болв манад эгл салдс бәәсн күн тенд ик сурһульта мергҗлт болсн деерән офицер-лейтенант болҗ цааранднь көдлнә. Курсантнр манад 2 җилдән сурна, онлын медрл авна, сурһулин чилгчәр эдн Аһшин мүҗин цергә әңгд сара хонга болзгт оч, тенд инженерин-техникин салврар дамшлт авна.
Кесгнь әәрмд одшгон төлә ик сурһулин медлин цергә төвд сурхар седнә, тиим кевәр зөв-йосна салврин бүрдәцст көдлмшт орҗ чадх. Хальмг ик сурһулин ханьд бәәдг цергә төвин материальн-техническ улнь тасрхан угаһар ясрулгдад бәәх, Әрәсән харслтын министерствин дөңгәр бат ясвр кегдв, компьютермүд болн нань чигн кергтә кергсл углҗ тәвгдв. Хальмг вузин һардач Салан Бадмин келсәр, төвин сурһулин болн кергслин таал тасрхан угаһар шинрүлгдәд бәәх.
Төвин һардачнь цергә ик дамшлтта офицер, полковник Дмитрий Александрович Марков болҗана, Залу-зөргин хойр орденә кавалер, кесг дәәлдәнд орлцҗ, яһҗ тер кемд үүлддгинь сәәнәр меднә.
Тер мет гуманитарн дацңд тууҗин эрдм дасчадг 4-ч курсин оютн Очра Виталий төвд яһҗ сурчахан, дөң цуглуллһнд яһҗ дөң болҗахин тускар келҗ өгв. Эгл салдсин әңгд Виталий сурчана, төвд цугнь дигтә-даратаһар бүрдәгдснь энүнд таасгдна. Цааранднь магистратурт сурхар седҗәнә, яһад гихлә эн җилин зунар бакалавриатан төгсәһәд хату цаасан авх, цергә сурһулян төгсәхин төлә бас өрәл җил үлдх.
Гуманитарн дөң цуглуллһнд Виталий бас үүрмүдләһән хамдан орлцна, тер кергән седклән өгч күцәҗәнә, яһад гихлә волонтерин үүлдвр бас ик дааврта гиҗ санҗана. Хальмг келән чигн онц курст дасчана, төрскн келн кезә чигн, цергә кергт чигн дөң болад бәәх гиҗ бат ицгтә бәәнә. Нуувчта юман төрскн келәр чигн келҗ болҗана, терүг талдан улс яһв чигн медҗ авшго, гиҗ тоолҗана.
Кү сумнас халхлдг гөлм чигн гүрҗ чадна, түрүн саамд тер керг курсантд күнд болҗ медгдҗәлә, болв тодрха цәәлһвр өгснә хөөн цугнь медгдәд бәәв, көдлмшән чигн Виталий түргәр күцәдг болв. Тиигҗ баһчуд олнд туста кергт орлцҗ цергә сурһулян чигн дигтә-даратаһар дасчана, цергә дамшачнр теднд дөң болна.
СВО-д церглҗәдг баһчудт эдн дөңгән күргхәр белн бәәнә, ниигмин сүлҗәнд теднә тускар бичнә, теднд кергтә зер-зевиг чигн, тер тоод улм төвәр хадг үнтә эв-арһиг цуглулад, дәәлдән болҗах һазрт йовулна. Тиигҗ ни-негнәр үүлдхлә ямаран чигн хортыг диилҗ болҗана.

ТҮРВӘН Һуна