Таңһчин делгрлтд нилчән күргҗәнә

Лу сарин 8-д мана орн-нутгт болн Хальмг Таңһчд номин өдр темдглҗәнә. Хальмг ик сурһулин баһ наста номтнр, тер тоод бод мал болн хө өсклһнә салврт генетикин шинҗллтиг күцәдг лабораторь номин халхар өргн көдлмш күцәҗәнә. Энүг баһ наста номт, биологин номин кандидат, биотехнологин тиңкмин доцент Чимдә Надежда һардҗана.
- 2022 җилд «Ном болн ик сурһуль» келн-улсин төсвин ул деер Хальмг ик сурһульд мана лабораторь бүрдәгдлә, энүнә делгрлтд 3 җилин эргцд 50 сай арслң һарһгдв. Баһ наста номтнр шинҗллтән кесн деерән номин кандидатын болн докторин диссертац харсх зөвтә билә. Тиим кевәр номин кадрмудын төр хаһлгдҗала,- гиҗ Надежда Васильевна келв.
Иигәд мана лабораторьт хойр номт эврә шинҗллтән күцәһәд, номин цол зүүв. Тер тоод Увшин Алтана болн Саңһҗин Роман биологин номин кандидатын диссертацан харсла. Роман Даваевич диссертацан минь одахн, бар сарин 26-д, харсла. Тохма мал өсклһнә төрәр эдн шинҗллтән күцәсмн. Эднә болн нань чигн номтнрин көдлмшиг селәнә эдл-ахун номин доктормуд, профессормуд Натра Аркадий болн Увшан Борис һардв.
Ода лабораторь даалһсн кергән күцәв, болв мана баһ наста номтнр цааранднь таңһчин номин-производствин халхар көдлҗәнә. Тер мет хальмг болн нань чигн тохма бод малын генетикин салврар шинҗллт кегдлә.
Профессор Владимир Бабенков тер көдлмшиг һардв. Аштнь тохма малын генетикин халхар номтнр ик медрл хоршаһад, ода эдл-ахусин мергҗлтнрлә дамшлтарн хувалцҗана, малын то икдүллһнд тернь туслҗана.
Тер мет Бурхн багшин номар, талдан кесг шаҗнла нөкцлтлһнә төрәр баһчудын лабораторь шинҗллтин ик көдлмш күцәҗәнә. Тернь Элстд болх һурвдгч шар шаҗна ик хургт белдхин төлә ик чинр зүүҗәнә. Энүнә тускар тиңкмин һардач, профессор Улана Мергн болн баһ наста номт Людмила Спиридонова келҗ өгв.
- Мана лабораторь хойр дундур җилин эргцд көдллә, ода үүлдврән төгсәв. Болв түүнә ул деер нарт-делкән шар шаҗна төв бүрдәгдх гиҗ күләгдҗәнә, эн төв Хальмг ик сурһулин медлд үүлдх. Бурхн багшин ном болн өдгә цагт делкәд күцәх бачм төрмүд, гисн төрәр баһ наста номтнр шинҗллтән кев. Тер көдлмш күцәлһнд эднд профессормуд Бадмин Валерий болн Бичән Баазр дөңгән күргв.
Өдгә цагт учрҗадг сольвриг Бурхн багшин ном цәәлһҗ чадҗана. Глобализацин таалд шар шаҗн цуг делкәд тархагдад йовна.
Эн төрәр профессормуд-сурһмҗлгчнр болн баһ наста номтнр хамцу шинҗллт күцәҗәнә. Эндр хойр номт Эрднин Баина болн Валерий Воробьев философин номин кандидатын цол зүүв.
Тер мет ода Людмила Спиридонова бас диссертацан харсхар белдҗәнә.
Баһчудын шар шаҗна сурһалин лабораторин ул деер бүрдәгдх нарт-делкән төв Бурхн багшин номин халхар кеҗәх шинҗллтиг цааранднь гүүдүлх. Тер тоод тод бичгәр бичсн дегтрмүд хүврүлгдх, нотмнрин нарт делкән коллективс бүрдәгдх.
Тиим кевәр Хальмг ик сурһулин номтнрин күцәҗәх шинҗллтс өргҗәд йовна, таңһчин экономикин болн сойлын делгрлтд эннь ик нилчән күргәд бәәхнь лавта.

ТҮРВӘН Һуна
(Эн төрәр цааранднь 7 халхд умштн)