Эмчнр селәдин әмтнд дөңгән күргҗәнә

Хальмг Таңһчин Толһач Хаска Батун седвәрәр «Эрүл-менд бәәтн» гидг керг-үүлдвр эклв. Терүнә медлд эмчнр таңһчин селәдт күрәд, бәәрн әмтнә эрүл-менд шинҗлҗ хәләһәд, эмнлһнә туст сүв-селвг өгхмн. Келхд, нидн эн керг-үүлдвр бас давулгдсн билә, терүнә йовудт ут тоодан 3 миңһн һар күн эмчд бийән үзүлсмн. Лу сарин 12-т эн керг-үүлдвр Целинн района Троицкое, Үстин района Цаһан Амн болн Эрдниевский селәдт эклв. Өцклдүр эмчнр Баһ Дөрвдә болн Яшалтан райодт одв.

Троицкое селәнд үүлддг Элст балһсна поликлиникин 5-ч тойгта әңгд әмтн кардиолог, эндокринолог, офтальмолог, терапевт, невролог болн нань талдан мергҗлтнрт бийән үзүлхәр өрүһәр ирснь үзгдв. Регистратурин көдләчнр ирсн әмтнд цугинь цәәлһәд, мергҗлтнрин хорас альк давхрт бәәхинь зааҗ өгв. Зәрм улс УЗИ, флюорографь, нүднә шинҗллт кехәр зөв авв. Эн әңг урднь района муниципальн бүрдәцин һардвр бәәсн бәәрнд бат ясвр кегдснә хөөн секгдв. Энд балһсна әдл цуг таал тогтагдв, мергҗлт болһн эврә хората, шинҗллт, тәрлһ болн эмнлһ келһнә шишлң хорас бас бәәнә.
Әңгин һардач Сюгира Баиран келсәр, энд цуг мергҗлтнр бәәнә, дор ормднь шинҗллт чигн кегднә, тегәд селәнә әмтнд Элст балһсур одх керг уга. Әңгд өдгә цага сән кергсл углҗ тәвгдсн бәәнә. Баира Владимировна маднд УЗИ, флюографь кедг хорас үзүлв. «Земск эмч» гидг көтлврәр көдлҗәдг баахн эмчнр Элән Александр болн Азда Деля УЗИ-шинҗллт кенә. Александр Сергеевич Әәдрхнә медицинск ик сурһуль төгсәснә хөөн П.Жемчуевин нертә таңһчин эмнлһнд күч-көлснә хаалһан эклсмн. Давсн җилин эклцәс авн эн балһсна поликлиникд көдлдг болв, хаврар шаңһа көтлврт орлцх шиидвр авад, Троицкое селәнд үүлддг терапевтическ әңгд ирв. Баахн эмчин келсәр, эн өсәд-боссн таңһчдан көдлх саната, нег һазра улсин эрүл-менд харлһнд тәвцән орулҗ туста болх күслтә. Деля Борисовна бас «Земск эмч» гидг көтлврт орлцад, энд ниднәс авн көдлҗәнә. Эн 2012 җилд балһсна поликлиникд терапевт болҗ күч-көлснә хаалһан экләд, шинҗллт кедг халхар мергҗлтән өөдлүлв. Мадниг эмчнрлә күүндҗәхлә Деед Яшкуль селәнд бәәдг Гадан Лариса УЗИ-шинҗллт кехәр ирв. Күүкд күн җил болһнд диспансеризацд орлцад, эрүл-мендин бәәдлән шинҗлнәв гив. «Мана селәнәс автобус нааран ирнә, тегәд эмчнрт дарунь күрч болна. Күн болһн чик авг-бәрцәр бәәһәд, эрүл-мендин бәәдлән шинҗләд, олн зүсн гемәс саглуллһна керг-үүлдлврт орлцх зөвтә. «Эрүл-менд бәәтн» гидг керг-үүлдвр бүрдәснь йир сән, әмтн терүнә медлд эмчнрин сүв-селвг авад, эмнлһ авч чадна. Мана селәнд Мушан Надежда фельдшерар көдлнә, эн бәәрн улст дөңгән күргҗ, күн болһниг оньгтан бәрҗ, кенд ямаран тәрлһ болн шинҗллт кехинь диглнә», – гиҗ күүкд күн келв.
Темдглхәс, Троицкое селәнд үүлддг әңгд 6 эмч «Земск эмч» гидг көтлврт орлцад, бооца батлҗ көдлҗәнә. Эдн дунд зүркнә эмч Бадмин Анҗа, терапевт Шамиль Шейхов болн нүднә эмч Учан Баира бәәнә. Цуһар эдн баахн болв чигн, кергән сәәнәр меддг, өөдән мергҗлттә гиҗ тоолгдҗ әмтн дунд күндллһ олв. Баира Валерьевна балһсна поликлиникин эс гиҗ таңһчин эмнлһнә улд нүднд месллһ кеҗ, өөдән чинртә дөң күргнә. Эн Санкт-Петербург балһснд эмчин эрдм дасад, хөөннь Аһш балһснд мергҗлтән өөдлүлсмн. Шамиль Абдулхамидович Троицкое селәнд өсәд-боссмн, энд эк-эцкнь бәәнә. Төрскн һазртан көдлҗәхнь энүнд ик бахмҗ болна, әңгд өдгә цага сән таал тогтагдсиг эн темдглнә. Баахн эмч Чаһрт, Деед Яшкуль, Ик Чонс болн Найнтахн селәдт батлгдсн өдрмүдт одад, бәәрн әмтнд дөңгән күргнә.
Овата селәнәс ирсн Руслан Рабаданов эмчнрт болн медицинск эгчнрт ханлтан өргҗ, эн әңгин көдләчнр цуһар килмҗтә, цаһан седклтә, әмтнлә тевчңгү гиҗ келв. Эн Бакулевин нертә эмнлһнд месллһ кесмн, Әәдрхн балһснд кардиологическ төвд дару-дарунь одад эрүл-мендин бәәдлән шинҗлдг бәәсмн. Ода болхла «Земск эмч» гидг көтлврәр Бадмин Анҗа кардиолог болҗ көдлҗәхәс иштә нааран ирәд, эмнлһнә туст селвг авна. Эмчин келсиг эн сәәнәр күцәһәд, чик авг-бәрцәр бәәҗ, кергтә эмиг ууна, тегәд эрүл-мендин бәәдлнь сән болв. Зүркнь шарклсн цагт тало авлго чигн эмчд ирәд бийән үзүлнәв, эн эмнлһнә туст дарунь сүв-селвгән өгәд дөң болна, гиҗ залу күн Анҗа Николаевичиг буульв.
Хальмг Таңһчин эрүл-менд харлһна министрин дарук Сарңга Гиләш «Эрүл-менд бәәтн» гидг керг-үүлдвр Троицкое селәнд ямр кевәр бүрдәгдсиг ирҗ хәләһәд, бәәрн улс терүнд шунмһаһар орлцҗахиг темдглв. Гиләш Васильевнан келсәр, давсн җилд давулгдсн керг-үүлдврт һурвн миңһн һар күн орлцв. Эн җил чигн селән һазрт бәәдг улсин эрүл-менд шинҗллһнә керг-үүлдвр өөдән кемҗәнд бүрдәгдҗ, терүнд орлцх әмтнә то икдүлх күсл тәвгдв. Эн җил моһа сарин 19 күртл эмчнрин багмуд селәдт одхмн. Эмчнр райодын төв селәдт одсн деерән, хол бичкн селәдт бас күрх. Района эмнлһст ямр нег мергҗлт уга болхла, балһсна поликлиникин эс гиҗ таңһчин эмнлһнә эмчнр тиигәрән одхмн. Яшалтан, Лаганя райодын эмнлһсин эмчнр хам-хоша бәәдг Городовиковск болн Хар Һазра райодын селәдт одад, дөңгән күргхмн. Тер мет мобильн ФАП, маммограф болн флюорогаф кергтә болхла бас олзлгдхмн. «Эрүл-менд бәәтн» гидг керг-үүлдврин хойрдгч девсң ноха сард болхмн, тегәд эмчнр ода эс күрсн селәдт зунар эрк биш одхмн гиҗ Сарңга Гиләш темдглв.
Троицкое селәнд үүлддг әңгд ут тоодан 164 күн эмчд бийән үзүлв, теднәснь 23 күн флюорографь болн 19 күн УЗИ-шинҗллт кев.

ДООҖАН Наталья
ЗУРГТ: эмч Учан Баира шинҗллт кеҗәнә