Белгородск зурачнрин һәәхүл

Н. Пальмовин нертә Келн-улсин музейд җилин туршарт олн һәәхүлмүд болна. Белгородск художественн музей «Победа – одна на всех!» гидг нертә һәәхүлән Элстд авч ирв. Төрскән харсгч Алдр дәәнд бәрсн Диилврин 80 җилин өөнд тернь нерәдгдҗәнә.

Келхәс, һәәхүл тиим нертә ик төсвин нег әңгнь болҗана. Эн ик чинртә төсвиг Белгородск музей Әрәсән цергә-тууҗин ниицәнә Белгородск региональн әңглә хамдан күцәҗәнә. Сойлын седвәрин Президентск саңгин дөңгәр терүгинь күцәх таал учрсмн.
Әрәсән олн регионмудын әмтиг сойлын дөңгәр негдүлх күслтәһәр кегдҗәнә. Нег орн-нутгт бәәх, күчтә дәәнд чидлән хамцулҗ, нег диилвр бәрсн олн келн-улс ни-негн бәәхд хамцу тууҗиг, хамдан давҗ һарсн амр биш хаалһд учрсн тоотыг сергәҗ, өсч йовх үйнрән сурһмҗллһнд тернь туслна.
Төрскнә чинртә тууҗин йовдлд нерәдсн эн һәәхүлиг түрүнкснь болҗ Хальмгин музей тосч авв. Алдр дәәнә йовдлмудыг тодлулсн зургудла болн нань чигн соньн тоотла таңһчин хотл балһсна хәләһәчнр таньлдҗана. Төрскән харсгч Алдр дәәнд һоллгч нег чинр зүүсн Курск дуһуд болсн дәәлдәнә тускар һәәхүл келҗ өгчәнә.
Дарунь эн һәәхүл Дагестанд үзүлгдхмн. П.С. Гамзатован нертә Дагестанск музейд һәәхүллә таньлдсн әмтн Курск дуһуд болсн дәәнд орлцсн цергчнрин дүрмүд үзхмн. Эн дәәлдәнә йовудт орн-нутгин цуг келн-улсин элчнр орлцсн учрар эн һәәхүл цуг улсин оньг эзлхнь маһд уга. Билг-эрдмин олн зүсн янзар 80 һар үүдәвр советск әмтнә залу-зөргиг тодлулҗ, Төрскнәннь төлә ээм-ээмән түшлдҗ боссн ни-негн әмтиг кен чигн диилҗ чадшгог медүлҗәнә.
ҖИРҺЛИН Кермн