Тууҗин зөөрин төрәр күүндв

Тууҗин зөөрин төрәр үүлддг комиссин дарани сүүр шидр Элстд болв. «Родина» сойлын төвд тәвгдх тосхачин бумблвин тускар түрүн төр хәләгдв. Орҗ ирсн кесг сүв-селвгиг тоод авч, тер бумблв өдгә цагла ирлцәтә болх зөвтәнь заагдв.
110-ч онц мөрн цергә Хальмг дивизин цергчнрин санлд нерәдсн бумбин туск төр ик чинр зүүв. Скульптор Николай Галушкин эврәннь зуран тускар келв. Терүнднь тавн талта одна өөгүр диилвр делдсн цергчнр йовҗ, мөңкрлтин хаалһд орҗах санан медүлгдҗәнә.
Бумб өндртән 6 метр болх зөвтә. Альд терүг тәвҗ болхин тускар комиссин гешүд күүндәд, дөрвн бәәриг таңһчин һардврин хәләврт орулҗ өгхәр шиидв. Тер дөрвн ормин дунд Элстин вокзалын өөрк бәәрн бас заагдсн бәәнә.
Хальмгин Баатр Манҗин Аркадьт бумб тәвлһнә болн хальмг көгҗмчин нертә талвңгиг яслһна төрәр чигн сүүрт күүндвр болв. Элстин классическ гимназин түрүн һардач Секенә Борисин неринь мөңкрүлх санлын самбр гимназин эрст углҗ тәвхин тускар чигн сүүрт шиидвр авгдв. МиГ-29 самолетд бумб тәвх бәәрн чигн сүүрин йовудт батлгдв.
ҖИРҺЛИН Кермн