Дәәнә цага газетмүд

А. Амр-Санана нертә Келн-улсин дегтрин саңд Алдр Диилврин 80 җилин өөнд нерәдәд дәәнә цага газетмүдиг өдгә цагин эв-арһар батлад, олн умшачнрт туста керг күцәв.

Дәәнә җилмүдт һарчасн газетмүдин халхсиг умшхла, тер күнд болн дүүвр цагин тоот седклд орсн болна. «Дәәнә һалд төрсн үгмүд» гидг нертә төсвин йовудт цуг тер тоотыг өңгәр олзлҗ болх таал учрв.
IT-компаня ИВИС-ин болн олна бүрдәцсин дөңгәр хальмг умшачнр дәәнә цагт бичгдҗ йовсн олн материалмудла таньлдх арһта болв. Дәәнә цага йовдлмуд тер дарунь, терүнд орлцҗ йовсн седкүлчнрин дөңгәр үзүлгдснь орн-нутгин чинртә цагин тууҗла үнн кевәр таньлдулҗахнь, нег үлү сән болҗана.
Дегтрин саңгин умшачнр «Правда», «Известия», «Красная звезда», «Литературная газета» тер цага газетмүдин болн долан хонгт нег дәкҗ һардг, «Огонек» седкүлиг умшҗ чадҗана. Белоруссин туршулчнр барлҗасн һарцла таньлдна гисн ямаран соньн болҗана.
Алдр Диилврин 80 җилин өөнлә тер хол туурмҗта цагиг сергәҗәх барин һарцсиг умшна гисн ик чинртә болҗахинь дегтрин саңгин һардач Майя Безидеева темдглнә. Газетмүдиг умшсн деерән оньгитн авлсн, таасгдсн материалмудыг хадһлҗ, шинҗлҗ, илдкл кехләрн олзлҗ болхин тускар Майя Николаевна зааҗ келв.
Дәәнә цага тууҗиг сергәх, тадна аавнр болн ээҗнр орлцсн йовдлмудын тускар тодрха медрл авх саната болхла, дегтрин саңгин төсвд орлцад, дәәнә цага газетмүдлә таньлдҗ чадҗанат.

ҖИРҺЛИН Кермн