Төрскнч сурһмҗ өгнә

Лу сарин 10-д Элстин олн салврта гимназьд таңһчин МВД-н ветеран, Чеченск Республикд болсн цергә керг-үүлдврт орлцҗасн зөргтә дәәч Наатра Җаңһрла харһлт болв. «Мана күндтә гиич Җаңһр Михайлович «Цергллтән йилһән сәәнәр күцәснә төлә» гидг медалин 1, 2 и 3 девсңгәр, тер мет «Төрскндән ач-тусан күргснә төлә», «Залу-зөргин төлә» болн «Олна диг-дара йилһән сәәнәр харҗасна төлә» гидг медальмүдәр ачлгдла, тернь маднд ик байр-бахмҗ үүдәв.

Баһчудт сән цергә-спортын белдвр өгхин төлә «Дәәч» нертә төвд Җаңһр Михайлович үүрмүдтәһән олн халхин ямаран көдлмш күцәҗәхин тускар бас тодрхаһар келҗ өгв», – гиҗ 11-ч классин сурһульчнр харһлтын туск тоолврарн хувалцв.
Төрскнч күн әәрмд цергллһнд белн болх зөвтә, спортын белдврән чигн тасрхан угаһар өөдлүлх зөвтә гиҗ күүндврин йовудт Җаңһр Михайлович темдглв. Баһ настадан әәрмд цергләд, сән белдврән медүләд, МВД-н ветеран оньдин нүүрт йовла. Тер бәәдл-җирһлин дамшлтын, түүнлә хамдан МВД-д церглҗәсн зөргтә үүрмүдин, теднә баатр кесг йовдлын тускар ветеран гимназин ах классин сурһульчнрт тодрхаһар келҗ өгв.
Түүнә тускар сурһульчнр эврә кесг сурвран өгв. «Тиим харһлт эндр өсҗәх баһчудт йир туста. Дәәч күүнә авг-бәрцин, төрскнч седклин, залу-зөргин тускар бидн, ах үүрмүднь, эцкнр-аавнрнь келҗ өгх зөвтәвидн. Баатрмудас үлгүр авад эдн Төрскән харсдгиг, дәәчин авг-бәрциг дасч авх, тиим заң-бәрциг седклдән батрулх»,- гиҗ тоолвран Җаңһр Михайлович келв. Тиим кевәр эн харһлт залу-зөргин болн төрскнч седклин туск кичәл болв. Иргнә хәләцән медүлҗ, Төрскән харсхин төлә, дәәлдәнд орлцхин төлә белн болх кергтә, гиҗ эн харһлтын йовудт сурһульчнр медҗ авв.
Эднә эцкнрәс ода кесгнь цергә шишлң керг-үүлдврт баатр кевәр уралһ седклән үзүлҗ юмнас әәлго мана өвкнрин авг-бәрцтәһәр хортна күчиг күүчҗ ноолдҗана. Тиим болв чигн мана баатрмудас, ЭМГ-н сурһульчнрин эцкнрәс зәрмнь зөргтә үүлдврән күцәҗ әмнәсн хаһцла.
Теднә тоод Лиҗин Николай баатр йовдларн йилһрлә. Николай Алексеевич 1982 җилин моһа сарин 3-д Көтчнрә района Тугтн селәнд һарла. 2000 җил күртл Тугтна дунд сурһульд сурла, түүнә хөөн цергт мордад Чеченск Республикд йовла. Тенд болсн дәәлдәнд орлцад, цергә үүлдврин ветеран болв, «Кавказд церглснә төлә» гидг медаляр ачлгдла.
Әәрмәсн бууҗ ирснә хөөн 2003 җилд таңһчин МВД-д церглдг болв. Шин һазртан чигн йилһрәд «Милицин йилһән сән көдләч» гидг медаляр ачлгдла, түүнә хөөн лейтенантын цол зүүһәд, таңһчин УФСИН-д көдлдг болв. СВО эклсн цагла Төрскән харсх санаһан дарунь медүллә, 2023 җилин мөрн сарла бооца батлад, Әрәсән Зертә-зевтә Чидлмүдин ханьд орв. Болв бийән әрвллго, залу-зөргтәһәр ноолдсна ашт 2024 җилин чилгчәр күчр-күнд дәәлдәнд орлцад, Лиҗин Николай әмнәсн хаһцла. Әрәсән Президент В.В. Путинә зәрлгәр Лиҗин Николай «Залу Зөргин» орденәр ачлгдла.
Тер ачлвр 2025 җилин туула сарин 31-д Элстин олна салврта гимназин 8-ч «А» классин сурһульч ууһн көвүн Баатрт бәрүлҗ өггдв. Тер күндтә кергиг Элстин цергә комиссариатын һардач А. В. Гаврильченко күцәв. «Лиджиевихнә өрк-бүлд һурвн көвүн өсчәнә. Эднә, мана гимназин цуг сурһульчнрин төлә Лиҗин Николайин үлгүр залу-зөргин, төрскнч седклин, Төрскндән итклтәһәр цергллһнә үлгүр болҗана.
Мана сурһульчнрин ахнр-эцкнр, гимназин төгсәһәчнр чигн ода СВО-д орлцҗана. «Мадниг угаһар керг бүтшго, бидн цергә дамшлт хоршасн дәәчнр болҗанавидн, әңгүдин командирмүдин даалһвриг кезә чигн хортна зер-зевиг, нацистнриг уга кеҗ күцәнәвидн», – гиҗ седклән медүлҗ мана сурһульчнрла болдг харһлтд, гер талан ахр болзгта амрлһнд ирсн кемд эдн келнә. Тиим зөргтә, хортна күчнд орҗ өгдго зөргтә хәләцд эдн мана сурһульчнриг, эврәннь дүүнрән дасхна», – гиҗ Элстин олн салврта гимназин һардачин дарук Чокан Зоя келнә.
Дииләчин тиим хәләц бәәхлә ямаран чигн күнд-күчр керг бүтх, терүг мана баһ наста баатрмуд СВО-д күцәҗәдг туурмҗта үүлдврәрн иткүлҗәнә. Тиим ханьта Әрәсән әәрм эрк биш диилвр бәрх, энүнә әңгүдин дәврлһн терүг лавтаһар медүлҗәнә.

ТҮРВӘН Һуна