Эк-эцкин бахмҗ

21-02-2025, 10:15 | Общество, Таңһчин зәңгс, Зіњг

Сүл җилмүдт мана таңһчд олн үртә өрк-бүлмүдин то өсәд йовхнь байрта йовдл гиҗ темдглх кергтә. Өнр-өсклң бүлд өссн ахнр-дүүнр җирһлиннь туршарт ниитә, дааврта, кен-негән хәләҗ, дөңнҗ өснә.
Приютна района Үлдчн селәнд мел тиим өрк-бүл бәәнә. Эрднь болн Гилән Намысовихнә бүлд тавн алтн үрн өсчәнә. Арвн нәәмн һар җил хооран Хальмг ик сурһуль төгсәһәд, баһчуд өрк-бүлән өндәлһв. Тер цагт олн үртә болхан сандго билә.
Герин эзн Эрднь Анатольевич полицин дааврта әңгин көдләчәр үүлднә. 2011 җилд Цугәрәсән марһанд орлцад, полицин дааврта әңгин хамгин сән көдләч гисн нер эн зүүв. Сул цагтан Эрднь шатр наадхдан дурта, олн зүсн марһаст орлцад, бас ончрсн билә. Гилән Александровна болхла олн җилдән О.Д.Мукаеван нертә Үлдчн селәнә келн-улсин гимназьд хальмг келнә багшар көдлнә. Ода үрән асрлһна амрлһнд бәәнә. Энүнә педагогическ күч-көлснә хаалһнь ут тоодан 24 һар җил тогтана, гиҗ келх кергтә. Терүнәс нань Намыса Гилән «Движение первых» җисәнә координатор болна.
Тавн хәәртә үрнь эк-эцкин бахмҗ болна. Ууһн Аюка 9 класст сурна, сурһулин хөөн бөк бәрлдәнә секцд одна. Таңһчин болн района кесг марһаст орлцад призерин нер зүүв. Саглр күүкнь 7 классин сурһульч, эн герән ахулад, экдән нөкд болна. Гилән Александровна күүкндән бичкнәснь авн үүл бәрдгиг дасхна. Дундкнь Нәдвд хойрдгч класст орна, күцәмҗәрн эк-эцкән бас байрлулна. Һунта Җигмд бичкдүдин садт орна. 2024 җилин чилгчәр, бар сарин 5-д Намысовихнә бүлд тавдгч үрн һарв. Көвүнд Бат-Төмр гидг нер өгв. Тегәд отхн үрнь шинкн хойр сарта.
Приютна районд болн Үлдчн селәнд болдг керг-үүлдврмүдт Намыса Гилән шунмһаһар орлцна. Ямр чигн нәр учрхла Гилән Александровна терүг чадмгар давулна. Тодлхас, урдк җилин бар сарин 25-д мана таңһчд Зулын байр темдглгдв. Үлдчн селәнд ирлцңгү нәр бас болв. Тегәд селәнә һардвр Намыса Гиләниг Зулын байриг давулхд сурв. Һартан нилх көвүтә бәәсн бийнь бер зөвән өгв. Селәнә нәр-нааднд нег һазра улс олар ирәд, цаган сергмҗтәһәр давулснь темдгтә болв.
Тер мет Гилән Александровна «Движение первых» җисәнә координатор болсн төләдән сурһульчнр дунд күндлһ болн тоомср олв. Хамдан тедн бас олн зүсн керг-үүлдврмүдиг бүрдәнә болн чинртә марһаст орлцна. Аһш балһснд болсн «Тууҗин хадһлачнр» нертә Цугәрәсән марһанд орлцад ончрсн билә. Терүнәс нань Үлдчн селәнд бәәдг Төрскән харсачнрин бумблвиг эврә хәләвртән авч, терүг даңгин ахулад, эргндк һазртнь хог-бог цуглулад цеврәр бәрнә.
2019 җилд Намысовихнә бүл «Җилин өрк-бүл» таңһчин марһана «Селәнд бәәдг өрк-бүл» гидг девсңд орлцад, олн зүсн күндллһнә темдгүдәр ачлгдсн болдг. 2023-2024 җилмүдт Москван ВДНХ-д болсн «Әрәсә» нарт-делкән һәәхүлд Приютна района делегацин ханьд Намыса Гилән бас орв. Чинртә һәәхүлд орлцсндан эн хөвдән ханна, гиҗ баахн бер келнә.
– «Әрәсә» һәәхүлд орн-нутгин талдан регионмудын элчнрлә таньлдад, теднә соньн һәәхүлмүдиг бас үзҗ үнлвидн. Тер мет һәәхүл давҗасн нег өдр мана таңһчин һәәхүлиг хәләхәр Әрәсән Федерацин Хүүвин ахлач Валентина Матвиенко орҗ ирв. Энүнлә харһҗ күүндсндән йир байрта бәәнәв, – гиҗ Гилән Александровна тоолврарн хувалцв.
Намысовихнә өрк-бүл төрскн райондан болн селәндән күндтә, тоомсрта улст тоолгдна, үрдтән чик сурһмҗ өгхәр зүткнә. Эндр олн үртә бүлмүдин төлә шаңһас олн дөңнлһнә эв-арһс йилһгдҗәнә. Тер мет 2023 җиләс авн Хальмг Таңһчин Толһач Хаска Батун седвәрәр һарсн нилх болһнд шишлң белг өггднә. Хойр сара хонг хооран тавдгч үрән һарһад, Намысовихн иим белг авсмн. Гилән Александровнан келсәр, тенд керглгдҗәдг цуг тоот орв, эннь йир сән дөң болҗана гив.
Дөрвн баатр болн алтн болҗадг һанцхн күүкн – мана хамгин ик зөөр болн бахмҗ мөн. Эдн маднд урмд өгч җивр урһана. Эрднь Анатольевич болн Гилән Александровна хоюрн олн үртә бүлд өсч босв. Тегәд өнр-өсклң өрк-бүл болснь ил медгдҗәнә. Эңкр үрдән өскәд, чик хаалһднь орулхар зүткчәнәвидн, гиҗ Намысовихн күслән медүлв.
КАРСАНА Евгения

Видео