Селәнәхн эмчнр ирснд байрлв

Хальмг Таңһчин Толһач Хаска Батун седвәрәр бүрдәгдсн «Эрүл-менд бәәтн» гидг керг-үүлдвр цааранднь райодар давулгдҗана. Эн долан хонгин эклцәр эмчнр Ик Буурла района Приманыч болн Ик Буурл селәдт одв. Һаза цаста болн салькта болв чигн селәнәхн эмчнрт бийән үзүлхәр адһв. Мадниг Приманыч селәнүр ирхд бәәрн сурһулин улд бүрдәгдсн керг-үүлдврт олн әмтн ирсиг үзвидн, бәәрн улсла зерглҗ хам-хоша бәәдг Баһ Буурл селәнә әмтн эн өдр бас эн керг-үүлдврт орлцхар ирв.

Приманыч селәнд олна дамшлтын эмч Очан Светлана олн җилдән көдлҗәнә. Медицинск эгчнр Тамара Синникова болн Боджан Сәәхлә бәәрн улсиг иим керг-үүлдвр бүрдәгдхин тускар зәңгләд, эртәснь эднә цаасд белдв. Олн зүсн хуучта, эмчин хәләврт бәәдг улс ямаран мергҗлтнр ирхиг медәд, эн өдр эмнлһнә туст немр сүв-селвг авхар ирв. Светлана Тавуновнан медлд Баһ Буурл селәнә әмтн бас бәәнә, тегәд эднд эмчнр ирхин тускар бас урдаснь зәңглсн билә. Хойр селәнд ут тоодан 1115 күн бәәнә, теднәснь 84 бичкдүд болна. Селәнә әмтнә эрүл-мендин бәәдл шинҗллһнә керг-үүлдвр давулхин төлә района эмнлһнә эмчнр ирв, зуг кардиолог Санҗин Инҗр (зургт) болн эндокринолог Арашан Вера Элстәс ирв, эдн П.Жемчуевин нертә таңһчин эмнлһнд көдлнә.
Ик Буурла района эмнлһнә поликлиникин һардач Һәрән Айсан келсәр, таңһчин Толһачин болн эрүл-менд харлһна министерствин седвәрәр эн керг-үүлдвр бүрдәгдснь селәнә әмтнд күргдг медицинск дөңгин чинр өөдлүллһнд туслна. Зәрм улс района бәәтхә, таңһчин эмнлһнд күрдг арһ уга болна, тегәд эмчнр бийснь нааран ирҗ шинҗллт кеснь, эмнлһнә туст сүв-селвгән өгснь селәнә әмтнд таасгдв. Приманыч селәнд эмчнр һурвн күүнә гертнь одад, дор ормднь дөңгән күргв. Таңһчин садв гемәс хөрлһнә диспансерин флюорограф болн Яшалтан района эмнлһнә мобильн комплекс ирв, тегәд әмтнд гүн шинҗллт кев. Эн керг-үүлдвр давсн җилд түрүн болҗ бүрдәгдхлә, Орһахн селәнәхн терүнд орлцсн билә. Эн зунар «Эрүл-менд бәәтн» гидг керг-үүлдврин хойрдгч девсң болх, терүнә медлд хол селәдт эмчнр күрх, - гиҗ Айса Ильинична цәәлһв.
Эмчнрт бийән үзүлхәр ирсн улс дунд ик зунь медәтнр болв. Баһ Буурл селәнд бәәдг Андрей Иккерт дару-дарунь эмчд бийән үзүлнә, цуснднь шикрин кемҗән өөдлдг учрар эн эмнлһнә туст эндокринолог эмчин сүв-селвг авхар ирв. «Мана эмч Светлана Тавуновна нанд эм бичүлҗ өгнә, мини эрүл-мендин бәәдләр соньмсад, чик авг-бәрцин туст селвг өгнә. Мана селәнд 2023 җиләс авн «Земск фельдшер» гидг көтлврин медлд Лизина Валентина ирҗ көдлҗәнә. Таңһчин эмнлһнә мергҗлтлә күүндәд, ямаран эм цааранднь аршалхин тускар селвлцх санатав. Селәнә әмтнә төлә иим керг-үүлдврмүд бүрдәх кергтә, юңгад гихлә зәрм улст балһс ордг арһ уга болна», - гиҗ медәт келв.
Таңһчин селәдәр давулгдҗадг керг-үүлдврин йовудт цергә шишлң керг-үүлдврт орлцачнрин эрүл-менд шинҗллһнд болн эмнлһнә туст дөң күрглһнд онц оньг өггднә. Ик Буурла района эмнлһнә һардвр цергә керг-үүлдврт орлцҗадг нег һазра улст эмчнр ирхин тускар бас зәңглв. Приманыч селәнд бидн Кичгә Петрла күүндвидн, эн ода гертән амрлһнд бәәнә. Петр Владимировичин келсәр, удл уга энүнә амрлһн төгсхмн, тегәд цергә даалһвран күцәхәр йовхиннь өмн эн эмчнрин хәләврт орхар шиидв.
Үдин хөөн эмчнрин баг Ик Буурл селәнүр һарч йовв. Өцклдүр эмчнр Хар Һазра района Комсомольский селәнд одв, эндр эдн Адг селәнд көдлҗәнә. Дарунь «Эрүл-менд бәәтн» гидг керг-үүлдврин йовудт Октябрьск района Восход болн Ик Царң селәдин әмтн эмчнрт бийән үзүлҗ чадхмн.
ДООҖАН Наталья