Келн-улсин байран тосч Цаһан хаалһар девший!

26-02-2025, 13:27 | Общество, Таңһчин зәңгс, Зіњг

Үвл төгсхдән өөрдәд, Цаһан Сарин байр Хальмг Таңһчд ирв. Кезәнә болхла, мана өвкнр үвлзңгән соляд, хаврин идгүдт малтаһан нүүдг бәәсмн. Тег серәд, хавр эклҗәхиг медүлдг байриг әмтн ик байртаһар тосна. Өдр утдад, шовуд җиргәд, үдин кемлә нарна герлд цуг эргндк дуларад, хаврин серүн салькн кеер һарх дур күргнә.
Хаврин серүн салькиг дахад, әмтн хаша-хаацан ясад, гер дотркан цеврләд, шин хувц белдәд, Цаһан Сариг тосна.
Эн җил Цаһан сарин байр лу сарин 28-лә болҗана. Хальмг Таңһчин Толһач Хаска Батун зәрлгәр Цаһан Сарин байрин өдр амрлһна өдр гиҗ зарлгдсмн.
Байрин ширә дүүрң болтха гиһәд әмтн эртәснь шимтә хот-хол белднә. Хамгин түрүнд элгн-садан, үүрмүдән Цаһана боорцгар тоона. Өрк-бүл болһн гертән күңшү һарһад, шишлң боорцг кенә. Цаһана боорцг болһн эврә учрта болна. Мана ээҗнр болн экнр терүгинь сән меднә. Бүклднь авад хәләхлә эврә һазртан ни-негн бәәснь хамгин евәтә болдгинь медүлгч ухан-тоолвр тер олн боорцгин нернд орсн болдг.
Кен-негндән гиичд одлһн эн байрин онц нег әңгнь болна. Цаһана боорцган авч одад, одсн гиичдән теднә боорцгар тоогдад, байрин нәәрән кенә. Элгн-садн, өөрхн иньгүд холд бәәсн бийнь эн өдр ирҗ золһдг авъяс бас бәәнә. Эк-эцкән күндләд, экин элгндән күрәд мендинь медх заңшал чигн эрк биш күцәгднә. Бичкдүдт нерәдсн эвтәкн боорцгуд кеһәд, тедниг келкәд, наһцнр зе бәрүлдг бәәснь бас ямаран сәәхн йовдл. Кезәнә цагас авн хадһлгдҗ йовх эн авъясмудыг күүкд-көвүдт дасххар таңһчин, балһсна дундын олн сурһульд Цаһан Сард нерәдсн нәр, харһлтс болн күүндврмүд кегднә. Цаһан Сарин тууҗин туск, эн байрла күцәгддг авъясмудын туск кесг марһанд бичкдүд болн баһчуд орлцна.
Эн өдр гертән өрүн зулан өргәд, мөргәд цә-боорцгарн дееҗ нерәдәд олн бурхндан әмтн зальврна. Йисн часла хурлд ирҗ, байрин мөргүлд орлцна. Цугтан хамдан Окн Теңгр бурхндан мөргәд, амулң-менд җирһлин төлә зальврна. Йириндән Цаһан Сарин байр әмтн ни-негн бәәхиг медүлдг байр болҗана. Эн 2025 җил Төрскән харсачин җилд хамцу бәәдл, хамцу үүлдвр нег үлү чинртә болҗана. Өвкнрин герәснд итклтә Хальмгин цергчнр зөвәр нәрн эн цагт цергә шишлң операцд дәәлдҗ йовна. Мана дәәчнр цергә даалһвран сәәнәр күцәҗ, эрүл-менд иртхә гиҗ таңһчин әмтн эн өдр зальврҗана. Эвин теңгр дор бәәхин төлә таңһчд цуг тоотнь ода кегдҗәнә. Таңһчин делгрлтин төлә цуг әмтн чидлән, медрлән, чадмган хамцулҗ үүлдҗәнә.
Цаһан Сарин байр цуг тер зүткмҗднь урмд өгч, таңһчин делгрлт цаһан хаалһта болтха!
УШКАНА Сувсн

Видео