Эврә эдл-аху бүрдәхд туслв

Үстин района Эрдниевский селәнд өсәд-боссн Әңгрә Станислав бичкнәсн авн эцкдән малын хошт нөкд болад, эн туст байн дамшлт хоршав. Эцкнь Сергей Эрдниевич олн җилдән селәнә эдл-ахуд хөөчәр көдләд, тегәд көвүндән мал асрлһна туст цугинь зааҗ өгв. Малын хошт арвн һар җилдән көдлснә хөөн эцкнь эврә дөңцл эдл-аху тогтаһад, гер деерән хөд асрдг болв. Хөөннь көвүнь чигн эврә дөңцл эдл-аху бүрдәв.

- 2022 җилд би района әмтнә социальн харслтын әңглә социальн бооца батлад, 100 миңһн арслңга дем авсн биләв. Тер мөңгәр хурһд хулдҗ авад, гер деерән эврә дөңцл эдл-аху бәрдг болв. Җирһлин күнд таалд туссн, баһ олз-орута улст шаңһас тиим дөң күргдгнь йир сән гиҗ тоолҗанав. Кергтә цаас белдәд, ямаран кергт демиг олзлхин туск зураһан харсад, социальн харслтын әңглә бооца батлсн биләв. Социальн харслтын әңгин мергҗлтнр цугинь цәәлһәд, дөң болснд би ханлтта бәәнәв. Түрүн болҗ батлсн бооцаһар цөөкн хурһд хулдҗ авад, бичкн-бичкнәр эдл-ахуһан делгрүлҗ үүлдв. Нидн би хойрдад социальн бооца батлад, 200 миңһн арслңга дем авв. Тер мөңгәр дәкәд хөд хулдҗ авсн биләв, - гиҗ Станислав Сергеевич келнә.
Бичкнәсн авн мал асрдгиг дассн төләдән эн эртәснь хот белдҗ, үвлзлһнд хаша-хаацан белднә. Малан бүрн-бүтн кевәр хадһлхин төлә малын эмчлә селвлцҗ кергтә эм хулдҗ авч олн зүсн гемәс саглуллһна тәрлһ кенә. Эцкднь ус зөөдг шишлң көлгн бәәнә, тегәд мал услхин төлә худгас ус авч ирнә. Эдн эдельбаевск тохма хөд асрна. Харм төрхд, ноосна үн бичкн болад, терүг хулддг арһ уга болна. Ирина авальнь эврә мал асрҗ дөңцл эдл-аху делгрүллһн эднә өрк-бүлд олзта-туста болҗахиг дөңннә. Эдн хамдан хашаһан цеврләд, хөөдин төлә сән таал тогтана. Удл уга төл авлһна дааврта кем эклх, тер цагт көдлмш икдх. Тегәд сән төл авхин төлә эдн арһ-чидлән негдүлҗ хамдан дааврта кемд көдлх.
- Нидн хур-чиг уга болад хөөдт идг уга болв. Хәрнь, намрар хур орад, шин ноһан һарснь бәәдлиг ясрулв. Үвлин кемд малан бүтн кевәр хадһлхин төлә бидн өвс хулдҗ авнавидн. Онц эзд селәдәр йовҗ өвс хулдна, тегәд бидн 3-4 руло өвс хулдҗ авсн биләвидн. Эн үвл дулан болв, тегәд гем уга үвләс һарвидн. Моһа сард шин төл авхар зуралҗанавидн. Эцкм маднас хол биш бәәнә, тегәд бидн нег-негндән нөкд болнавидн. Хөд бийснь кеер идшлнә, хол йовшгон төлә дару-дарунь хәләһәд гер талан тууҗ авнавидн. Шаңһас өгсн демәр мал хулдҗ авснь мана өрк-бүлин олз-ору икдүлхд туслв, тегәд өөрхн иргчдән эдл-ахуһан икдүлх зура бәәнә. Сәәнәр көл деерән батрад, эврә малын хош тосхх күслтәв, – гиҗ залу күн зураһарн хувалцв.
Әңгрә Станислав Ирина авальтаһан Айлана болн Карина күүкдтә, эдн селәнә дунд сурһульд сурна. Эк-эцкнь Сергей Эрдниевич болн Алла Бадмаевна 45 җилдән ни-негн бәәнә,эдн 6 ач-зееһиннь кишгт багтҗ, көвүн-күүкнәннь күцәмҗд байрлна. Көвүнь социальн бооца батлад, төрскн селәндән бәәһәд, мал асрҗ кергән делгрүлҗәхнь эднд бахмҗ үүдәнә. Бичкнәсн авн эцкән дахад мал асрлһна көдлмшиг сәәнәр медсн төләдән эн эврә дөңцл эдл-аху бүрдәҗ, өрк-бүлән теҗәҗ үүлдҗәхиг эк-эцкнь дөңннә. Төрскн һазртан бәәһәд, олзта-тустаһар көдләд, күүкдтән чик сурһмҗ өгч олна хормад багтҗ йовхнь залу күүнд бас ик урмдта болна.

ДООҖАН Наталья