Седвәртә күүкд улсиг ачлв

Вчера, 12:14 | Общество, Таңһчин зәңгс, Зіњг

Күүкд улсин Өдрт нерәдҗ Элстд «В мир приходит женщина» ик хург болв. Терүг Хальмг Таңһчин күүкд улсин ниицән бүрдәҗ давулв. Байрин керг-үүлдврт Хальмг Таңһчин Улсин Хуралын (Парламентин) Ахлач Артем Михайлов, Хальмг Таңһчин залврин Ахлач Босхмҗин Гилән орлцв. Райодт үүлддг күүкд улсин ниицәнә әңгүдин элчнр хургт бас орлцад, олн җилин эргцд таңһчин олна бәәдл-җирһлд шунмһаһар орлцҗадг төләдән ачлгдв.

Таңһчин күүкд улсин ниицән хөрн һар җилин эргцд үүлдҗәнә, терүнә ханьд 4600 күүкд күн орна. Олна ниицәнә гешүд эврә һарарн кесн кегдлмүдин һәәхүл бүрдәв, байрин хургин йовудт болсн концертд билг-эрдмән үзүлв.
Таңһчин Улсин Хуралын (Парламентин) Ахлач Артем Михайловин темдглсәр, эндр күүкд улс эрүл-менд харлһна, сурһуль-эрдмин, сойлын, промышленностин, политикин болн шаңһа залврин бүрдәцст көдлнә. «Күүкд улсин нарт-делкән Өдр энтн мана сәәхн күүкд улст зүркни ханлтан болн күндллһән медүлҗәдг байр болна. Төрскән харсгч Алдр дәәнд зөрмг кевәр дәәлдҗ, фронтыг тетхин төлә тылд көдлҗ йовсн күүкд улсин ач-тусиг онц темдглх кергтә. Эндр цергә шишлң керг-үүлдврт мана күүкд улс бас зөрмгән үзүлҗ церглҗ йовна. Цергә шишлң керг-үүлдврт орлцҗадг авальмудан болн көвүдән дөңнҗ дәәнәс хәрҗ ирхиг күләҗәнә», – гиҗ Артем Васильевич келв.
Байрин хургин йовудт таңһчин бәәдл-җирһлд шунмһаһар орлцҗадг, дорас өсч йовх бичкдүдт төрскнч сурһмҗ өгч, күцәмҗтәһәр үүлддг күүкд улс Хальмг Таңһчин Улсин Хуралын (Парламентин) Ахлачин Ханлтын бичгәр, «Төрскнә күүкд» гидг медаляр ачлгдв. Темдглхәс, эн медаляр Хальмг Таңһчин залврин Ахлач Босхмҗин Гилән бас ачлгдсиг хургт орлцачнр байртаһар тосв. Хальмг Таңһчин залврин Ахлач Босхмҗин Гилән күүкд улсиг өөрдҗ йовх байрла йөрәһәд, Хальмг Таңһчин Толһачин Ханлтын бичгәр болн таңһчин залврин Күндллһнә һашгар күүкд улсин ниицәнә гешүдиг ачлв. Артем Михайлов болн Босхмҗин Гилән цергә шишлң керг-үүлдврт орлцачнрин экнрт болн авальмудт онц ханлт өргәд, белг бәрүлҗ өгв.
Күүкд улсин хургт орлцачнр таңһчин билгтнрин концерт хәләв. Сән өдрин өмн өргнд күүкд улс сәәхн дууна айст авлгдҗ сергмҗтәһәр амрв.
ДООҖАН Наталья

Видео