Төрскн келнә кеерүл

Хавр ирсн цагла, нарна герлд цугнь әмләд, шовуд җиргәд, теегт һарч цевр аһар киилх седкл төрнә. Шүлгүд умшх, байр үүдәх дурн бас амр өгхш. Тегәд моһа сарин 13-д Хальмгин шүлгләнә өдр гиҗ байр үүдәснь чигн хара йовдл биш гиҗ санхмн. Хальмг улсин бичәч, делкәд нер һарсн шүлгч Көглтин Даван һарсн өдрлә ирлцүлҗ эн байрин өдр зарлгдсн болдг.
Таңһчин Толһач Хаска Батун темдглсәр, Көглтин Дава мана оньгиг билгин күчәрн болн цецн ухаһарн авлна. Әмтнә җирһлиг сән кевәр медҗ, терүг сүркә төв кевәр үзүлдгәрн мадна уха эзлнә. Энүнә шүлгүд хамгин сәәхн ухан-седкл үүдәнә, гиҗ Бату Сергеевич тоолна. Таңһчин Толһачин седвәрәр тосхгдсн күңкл шүлгчин бумбин өөр эндр шүлгүднь күңкнхмн.
Иигәд хаврин сәәхн нег өдрлә таңһчд Социалистическ Күч-көлснә Баатр, СССР-ин болн РСФСР-ин шаңһа мөрәсин лауреат, Хальмг улсин шүлгч Көглтин Даван нериг бидн шүлгүдинь умшҗ тодлнавидн. Хальмг теегин хаврин сәәхн цагиг шүлгүдтән мөңкрүлсн шүлгчин нерн эн өдр җил болһн амлгдна.
Төрскн келнә ке-сәәхниг үүдәврмүдәрн медүлсн Калян Санҗин, Эрнҗәнә Константинә, Сән-Белгин Хасрин, Балакан Алексейин, Сусен Аксена, Нармин Морхаҗин, Хоньна Михаилын, Тачин Анҗан, Җимбин Андрейин, Бембин Тимофейин, Байдын Санҗаран болн нань чигн олн шүлгчнрин үүдәврмүдиг эн өдр сурһулин бүрдәцсәр, дегтрин саңгудт чигн соңсч болхмн. Хальмг улсин урн үгин зөөрин ул деер төрсн эднә төрскнч седклтә шүлгүд өсч-боссн һазрин күчинь дәкн нег үзүлхмн.
Эндр А. Амр-Санана нертә Келн-улсин дегтрин саңд өдгә цага хальмг шүлгчнрин дегтрмүдлә умшачнр таньлдхмн. Давсн җилд таңһчин сойлын болн зуульчллһна министерств хальмг келәр бичдг түүрвәчнриг дөңнсн керг-үүлдвриг түрүн болҗ күцәв. Марһа зарлад, терүнә ашар шүүҗ авгдсн һурвн түүрвәчин дегтр барлгдв. Тегәд эндр дегтрин саңд Канкан Эрднин, Увшин Вячеславин болн Боован Куукан Валентинан дегтрмүдлә умшачнр таньлдхмн. Эн җилин эклцәр Калян Санҗин 120 җилин өөн, лу сарин 5-д Нармин Морхаҗин 100 җилин өөн темдглгдв.
Хальмг улсин төрскн келнә, сойлын, авъясмудын салһгдшго нег әңгнь болҗадг хальмг шүлглән тиигәд мана җирһлин сәәхн урмднь болҗ, уралан зүткх седклтәһәр умшачнриг көтлнә.

ХӨӨЧИН Галина