Эрк биш диилвр бәрхин төлә

Моһа сарин 4-д Әрәсән телеүзләр болдг «Время СВОих» соңсхврт цергә шишлң керг-үүлдврин ветеран нег һазра мана Евгений Тобомбаев орлцв. Терүнә йовудт баахн дәәч эврәннь болн күцәсн даалһврин тускар тодрхаһар телехәләһәчнрт келҗ өгв.

Евгений Тобомбаев Целинн района Ик Чонс селәнд өсәд-боссн көвүн мөн. Цергә шишлң керг-үүлдврт эклснәс авн Евгений орлцсн болдг.
«Время СВОих» соңсхвриг давулдг Руслан Осташко болн Екатерина Шугаева хальмг дәәч туурмҗта йовдл күцәснә тускар олнд медүлв. 2022 җилд Херсонск зөрүллтд болсн нег дәәлдәнә йовудт Евгений Тобомбаев һазр дорас һарчасн күүнә ду соңсв. Өөрдәд ирхлә, цергә хойр үр көвүнь окопд шаврар даргдснь медгдв. Һундл төрхд, эднә негнь күнд шав авад, хәәкрн бәәҗ зовад әмнәсн хаһцв. Хойрдгчинь һарһҗ авхин төлә Евгений һарарн һазр малтад, үр көвүһән һарһҗ авв. Тер дарунь гилтә шавтсн дәәчнриг цуглулдг шишлң көлгн ирәд, тер көвүг эмнлһнд күргв.
«Вега» дуудврта мана цергчин келсәр, кен болв чигн мел иим кевәр бас нөкд болх бәәсмн. Дәәлдән болҗадг һазрт цергә кергән күцәсн деерән өөрнь йовдг үүрмүдән бас хәләҗ, нөкд болх кергтә.
Даруһас Евгений бас тиим күнд таалд тусв. Донецкин зөрүллтд болсн йовдлын тускар эн келҗ өгв. Нег өдр өрүн эртәс авн асхн күртл БПЛА нисч ирәд бәәсмн. Өдрин туршарт энд-тенд хаһрсн юмна ә соңсгдад бәәв. Муурсн Евгений бийән саг бәәхин тускар мартад, генткн энүнд түргн дөң болҗасн кемд серв. Күндәр шавтад, көлнь йир икәр өвдҗәлә. Кесг үүрмүднь Евгенийиг әәмшг уга ормд авч ирв. Тедн дунд «Сява» дуудврта цергч билә. Мел эн көвүн хальмг дәәчиг әмдәр эмчнрт күргҗ өгхин төлә хаалһднь энүнлә күүндәд, ду дуулад йовла. Зуг тер йовдлд Евгений нег көлән геев. Хальмг дәәчин әминь аврсн «Сява» дуудврта үрнь соңсхврт видеозалһлдана эв-арһар орлцҗ, тер йовдлын тускар бас тодлв.
Эндр цергә шишлң керг-үүлдврин ветеран Евгений Тобомбаев Улсин Фронтын региональн әңгд көдләд, нег һазра цергчнрт дөңгән күргҗәнә. «Цугнь Диилврин төлә» төсв күцәлһнә йовудт кесг дәкҗ СВО-н һазрт одад, буйнч седклин дөң күргв. Тер мет дорас өсч йовдг баһчудла даңгин соньн харһлтс бүрдәнә. Терүнәс нань Евгений гитар цокхдан дурта. СВО-н талдан ветеранмудла хамдан «Союз СВОих» нертә көгҗмин баг бүрдәсн болдг. Удл уга нег һазра цергчнр тал йовад, тедниг урмдулгч дуд дуулҗ, сергмҗ үүдәхәр зуралҗана.
КАРСАНА Евгения