Әәдрхнәхн Цаһан Саран темдглв

18-03-2025, 16:48 | Общество, Таңһчин зәңгс, Зіњг

Җил болһн тогтсн авъясар хам-хоша бәәдг Әәдрхнә мүҗд Цаһан Сарин байр темдглнә. Бемб өдрлә Әәдрхнә мүҗин филармоньд ирлцңгү керг-үүлдвр болв. Әәдрхнә мүҗин сойлын министерств, улсин сойлын номин-методическ мүҗин төв болн «Хальмг» нертә хальмг сойлын Әәдрхнә мүҗин ниицән энүг бүрдәсн болдг.

Хальмг Таңһчин залврин Ахлач Босхмҗин Гилән, Улсин Хуралын (Парламентд) таңһчин Толһачин элч Манҗин Араш, сойлын болн зуульчллһна министрин дарук Саңҗрһа Герман, «Бамб цецг» ансамблин артистнр терүнд орлцв.
Байрин концерт эклхин өмн олн-әмтн хальмг келн-улсин авг-бәрцин туск соньн һәәхүл хәләв. Тер мет Н.Крупскаян нертә Әәдрхнә мүҗин дегтрин саңгин көдләчнр хальмгудын тускар дегтрин һәәхүл бас бүрдәв. Байрт ирсн улсиг әмтәхн боорцгар болн улан зандн цәәһәр тоов. Келхд, Әәдрхнә мүҗд бәәдг хальмгуд, тер мет тенд сурһуль сурчадг оютнр энд олар цуглрв. Терүнәс нань Әәдрхнд үүлддг олн келн-улсин бүрдәцсин элчнр байрт бас орлцснь темдгтә болв.
Концертиг Әәдрхнә шаңһа дууна болн бииһин ансамблин артистнр секв. Эдн Әәдрхнә мүҗд бәәдг олн келн-улсин би биилв. Хальмг улсин бииг болхла, цуһар альхан ташад бүләнәр тосв.
Әәдрхнә мүҗин залврин ахлач Денис Афанасьев тәәз деер һарад, цугтаһинь хаврин байрла йөрәв. Энүнә келсәр, олн җилдән Әәдрхнә һазрт олн келн-улс хоорндан ниитәһәр бәәҗ, байрин өдрмүдән даңгин хамдан давулдгнь сән авъяст тохрв.
Хальмгин залврин Ахлач Босхмҗин Гилән таңһчин Толһачин йөрәлин бичг умшҗ олнд соңсулв.
«Хам-хоша бәәдг әәдрхнәхн хальмг келн-улсин байрин керг-үүлдврмүдт даңгин орлцна. Әәдрхнә мүҗд хальмгуд олар бәәдг учрар Цаһан Сарин байр энд җил болһн давулгдна. Әәдрхнә мүҗин губернатор Игорь Бабушкинд онц ханлтан өргҗәнәв. Цуһар эрүл-менд, байрта-бахта бәәҗ, цаһан хаалһар йовтн», гиҗ йөрәлд келгдв.
Гилән Герасимовнан темдглсәр, Әәдрхнд давулгдсн Цаһан Сарин байр Әрәсәд бәәдг олн келн-улсин хоорднк хәрлцә батллһнд ик тәвцән орулҗана. Өвкнрин үлдәсн зөөриг дорас өсч йовдг баһчудт бидн медүлх зөвтәвидн гив. Цаһан Сарин нәәриг бүрдәсн улст ик ханлтан өргҗ, олн-әмтиг эн бас йөрәв.
– Цаһан Сарин байрла нег һазра улсан болн Әәдрхнә мүҗд бәәршлдг хальмгудыг әрүн седкләсн йөрәҗәнәв. Урдк кевәрн цуһарн ахнр-дүүнр мет бәәхвидн. Әәдрхнә мүҗин болн Хальмг Таңһчин һардврт мадниг цуг халхар дөңнҗәдг төләд ик ханлтан күргҗәнәв, – гиҗ «Хальмг» нертә хальмг сойлын Әәдрхнә мүҗин ниицәнә ахлач Эльдән Николай темдглв.
Байрин йовудт Әәдрхнә мүҗд бәәршлдг улсин сойлын-тууҗин зөөр хадһллһнд тәвцән орулҗадг төләдән Лиманск района «Герл» ансамблин һардач Му-Һәрән Ирина, дуучнр Нарна Светлана, Бадмин Людмила болн ансамбльд талдан орлцачнр Хальмг Таңһчин Толһачин Ханлтын бичгүдәр ачлгдв. Тер мет Әәдрхнә мүҗин Губернаторин Күндллһнә һашгиг Лиҗин Арслңд болн Му-Һәрән Иринад бәрүлҗ өгв.
Концертд орлцсн «Бамб цецг» дууна болн бииһин шаңһа академическ ансамблин артистнрин билг-эрдмиг әәдрхнәхн ик байртаһар тосв. Хәләһәчнрин дунд суусн хальмгуд ормасн босад, тедниг дахад биилв.
Керг-үүлдврин чилгчәр Әрәсән сойлын ачта көдләч Александр Лавриненко һарддг Әәдрхнә дууна болн бииһин шаңһа ансамблин артистнр «Бамб цецг» ансамблин артистнрлә хамдан «Чичрдг» бииләд олыг байрлулв.

КАРСАНА Евгения

Видео