Хальмгин түрүн нисәч-багшиг тодлад

Ачта багш, таңһчин түрүн күүкн-нисәч Сохра Булһна 103 җилин өөнд нерәдсн төрскнч дууна наадм Улан Эрг селәнә сурһульд болв.

Кезәнә, 143 җил хооран Улан Эрг селәнд орс чонҗин медлд түрүн сурһуль секгдсмн. 1972 җилд тиим ут тууҗта бүрдәцин һардачнь дамшлтта багш, Әрәсән олн улсин гегән-герлин салврин йилһән сән көдләч, Хальмг Таңһчин түрүн күүкд күн нисәч, урднь Тавн Һашун селәнә сурһулиг һардҗ йовсн тоомсрта олна үүлдәч Сохра Булһн болв. Тиигхд Улан Эргд сурһулин шин гер тосхгдҗала. Нег җил болад 1973 җилд цуг сурһульчнр болн багшнр хойр давхр у-сарул герт орҗ сурдг болв. Шин кергсл оруллһна ик көдлмшиг Булһн Отямишевна багшнрла хамдан күцәв. Энд һардачар, дәкәд хальмг келнә багшар көдләд эн ачта амрлһнд һарла.
Багшнр болн сурһульчнр ода чигн эврә күндтә ах үүрән, селвгчән тодлна, Сохра Булһна санлд нерәдҗ 2024 җилд эдн санлын самбр секлә. Бас тер кемд таңһчин түрүн хальмг күүкн –нисәч, тоомсрта багштан нерәдәд җил болһн дууна наадм кех шиидвр батлгдла.
Эн җилин моһа сарин 14-д Улан Эргин дунд сурһульд төрскнч дууна наадм эклв. Энүг нүр үгәр бүрдәцин һардач Бембән Делгр секв. «Мана эңкр багш Сохра Булһниг сәәнәр тодлнавидн, түүнд нерәдсн түрүн наадм сексн йовдлла тадниг йөрәҗәнәв, җил болһн эн нәр-наадыг күцәхвидн. Булһн Отямишевна ду дуулхдан дурта билә, тадн бас билг-эрдмән делгрүлтн, цуг таанрт күцәмҗ дурдҗанав», – гиҗ Делгр Җиҗәевна цугтаһинь йөрәв.
Дарунь Улан Эргин сурһулин 2-ч классин сурһульчнр хальмг келәр йөрәлән келәд, байр үүдәв. Элстин билг-эрдмин колледжин 2-ч курсин оютнр Саарла Элистина болн Босхмҗин Делгр хальмг айсмудыг домбр цокч седклән өгч наадв.
Колледжин һардач Эрнҗәнә Лилия орлцачнрт күцәмҗ дурдҗ нисәч хальмг күүкн Сохра Булһнас үлгүр авч, бас тиигҗ күслдән күрч, Төрскндән итклтә улс болтн гиҗ йөрәв. Улан Эргин «Родничок» садын сурһмҗлачнр ду дуулад, бичкдүднь болхла би бииләд сергмҗ үүдәсн болдг. Тиим билгтә бичкдүд теңгсин цергчин, салдсин сәәхн хувцан өмсәд, дуулад-бииләд, цуг хәләһәчнрин седклинь авлв. Тиигҗ бичкнәснь авн олна наадмд орлцулҗ сурһмҗлачнрнь ик туста көдлмш кеҗәнә.
Ах классин сурһульч Виолетта Казаченко хальмгар өдгә цагин хальмг ду дуулв, тернь бас сән үлгүр болҗана. Баһчуд төрскн келәр ду дуулхла, мана келн цааранднь өргҗәд бәәх, арвтнрин зүткмҗинь дөңнәд бәәх кергтә. Наадмд Улан Эргин бәәтхә, хам-хоша бәәдг селәдин сурһульчнр болн багшнр бас орлцҗ, билг-эрдмәрн байрлулв. Тер тоод Чилгр селәнә сурһулин 2-ч класст сурчадг кесг келн-улсин элчнр хальмгар ду дуулв, келнь йир сән, нам талдан келн күн дуулҗана гиҗ келҗ болшго, хальмг келнә тиим бат медрл багшнр эднд өгчәнә.
Тер мет Улан Эргин сурһулин 5-ч классин сурһульчнр орс болн хальмг келәр олнд темдгтә «Катюша», багшнрнь «Победа, Победа» гидг ду дуулв. Сурһулин хальмг келнә багш Долган Байр болн эсвин багш Санҗһәрән Галина «Аавин һанц чамдан» гидг ду дуулснь әмтнә седкл авлв.
Тиим кевәр Утта, Гашунский, Чилгр селәдин элчнр эн наадмд орлцҗ, билг-эрдмән үзүлв. Нүүрлгч ормс эзлсн уйн наста билгтнр Күндллһнә һашгудар ачлгдв. Цугтаднь түрүн наадм таасгдв. Талдан селәдин багшнр тиим керг-үүлдврт орлцулснднь күндтә бүрдәһәчнрт ханлтан өргв. Улан Эргин сурһулин багш Айса Марчелова ирсн гиичнрт болн эврә сурһульчнрт «Севастополь» гидг дууна төрскнч учр-утхинь дигтәһәр медүлв. Бас бүрдәһәчнрин элч, негдгч классин сурһульч Хаалһин Александра өвк-эцкдән нерәдҗ «Прадедушка» гидг ду дуулв.
Хальмг нисәч, багш Сохра Булһна санлд нерәдсн төрскнч дууна наадм тиигҗ олнд ик байр үүдәҗ, Яшкулин района селәдин сурһульмудын ик нәр-нааднд хүврв. Цуг орлцачнр түрүн наадмд сәәнәр белдв, цугтан хальмг хувцан өмсәд тәәз деер һарч дуулв.
ҖААХАН Бадм