Төрскән харсачнрт дөңгән күргий!

20-03-2025, 10:56 | Общество, Таңһчин зәңгс, Зіњг

Буйнч седклин концерт моһа сарин 22-т Элстд болхмн. Цергә шишлң керг-үүлдврт орлцҗадг цергчнрт дөң болхин төлә таңһчин цуг әмтн, тер дотр сойлын көдләчнр, билг-эрдмин үүлдәчнр арһ-чидлән хамцулҗана. Эн концертин тускар «Калмыкия» таңһчин зәңгллһнә агентствд болсн брифингд келгдв.

Таңһчин сойлын болн зуульчллһна министрин дарук Саңҗрһа Герман, цергчнрин өрк-бүлмүдин комитетин ахлач
Кокан Виталия, сойлын ачта көдләч, эн керг-үүлдвриг бүрдәҗәдг Виктор Верехин брифингд орлцҗ, концертин тускар келҗ өгв. Эндрк өдрин һол төр Төрскән харсачнрт дөңгән күрглһн болҗана. Нег үлү эднә өрк-бүлмүдтнь, күүкд-көвүдтнь бас килмҗән һарһх кергтә. Басңга Баатрин нертә Келн-улсин театр, драмин болн шог наадна Орс театр, «Бамб цецг» ансамбль, «Өөрднр» бииһин театр, нань чигн таңһчин үүдәгч коллективс, нертә артистнр моһа сарин 22-т болх ик концертд орлцхар белдҗәхин тускар Санҗрһа Герман келв.
Кокан Виталиян келсәр, цергчнрин өрк-бүлмүдт дөң боллһна туст эднә комитет кеҗәх көдлмшт олн улс орлцсн болхла, нег үлү сән болхмн. Моһа сарин 22-т болх концертд салдсмудын гергчүдәс тогтсн дууна баг орлцҗ, билгән үзүлхмн.
Виктор Верехин болхла концертд ямр нег учрар эс ирҗ чадсн улс Qr -кодар дамжулад, демән күргҗ болхин тускар келв.
Буйнч седклин үүлдвр Җаңһрин баатрмудын андһарар эклхмн. Концертд лавта йовдлмудын тускар келгдхмн, нер һарсн баатрмудын нерд заагдхмн. Афганск болн чеченск дәәлдәнд, цергә шишлң керг-үүлдврт орлцсн улс белдсн «Дәәлдәнд төрсн дуд» гидг хураңһуд орсн дуд соңсгдхмн.
Нертә олн артистнрлә хамдан концертд цергчин дөнтә күүкн орлцҗахнь хамгин сәәхн темдг болҗана.
Күн болһна демәр ик керг күцдг, гиҗ кезәнә келсн цецн үг бәәнә. СВО-д орлцачнрт болн теднә өрк-бүлмүдт цугтан дөңгән күргхмн.
ҖИРҺЛИН Кермн

Видео