Цергчнриг көдлмшәр теткхин төлә

20-03-2025, 10:58 | Общество, Таңһчин зәңгс, Зіњг

Давсн җилд мана орн-нутгт Әрәсән Президент Владимир Путина зәрлгәс иштә «Баатрмудын цаг» гидг шишлң көтлвр эклсмн. Цергә шишлң керг-үүлдврт орлцад, залу-зөрмгән үзүләд, Төрскндән итклтә болҗахиг медүлсн улс терүнд орлцад, немр сурһуль сурад, мергҗлтән өөдлүләд шаңһа болн муниципальн бүрдәцст көдлдг болв. Орн-нутгин толһачин даалһврар регион болһнд ирлцңгү көтлвр бас күцәгдх зөвтә болсмн. Тегәд Хальмг Таңһчин Толһач Хаска Батун шиидврәр мана таңһчд «Баатрмуд 08» гидг региональн төсв зарлгдв.

Шидр Хальмг Таңһчин залврин Ахлачин дарукин –таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Марина, Б.Б.Городовиковин нертә Хальмг ик сурһулин һардач, таңһчин Улсин Хуралын (Парламентин) депутат Салан Бадм болн «Дәәч» спортивн-цергә белдврин болн төрскнч сурһмҗин төвин ах инструктор, Элст балһсна Хургин депутат Чумуда Николай таңһчин олнд зәңгллһнә эв-арһсин көдләчнрлә харһад, эн төсвин йовудт күцәгдх керг-үүлдврмүдин тускар тодрхаһар келҗ өгв.
Тиигәд Өлзәтин Маринан келсәр, таңһчин Толһач Хаска Батун зааврас иштә эн төсв күцәлһнә бүрдәмҗин комитет, олна хүүв тогтагдв. Ода деерән 190 күн эрлһән орулад, эн төсвд орлцхан медүлв. Төсв лу сарин 27-ас авн экләд, һурвн девсңгәр давулгдхмн. Түрүн девсң моһа сарин 27 күртл болхмн, терүнә йовудт цергә шишлң керг-үүлдврт орлцачнр эрлһән орулад, иткл цаасд өгсн деерән үүдәвр көдлмш бичх зөвтә. Иткл цаасдыг болн эрлһиг электронн кевәр орулҗ болхмн, тегәд ода цергә даалһвр күцәҗ йовх улс бас төсвд орлцҗ чадҗана. Дәкәд талдан балһсдт бәәдг мана нег һазра улст бас эн төсвд орлцх зөв өггдҗәнә. Моһа сарин 28-әс авн мөрн сарин 27 күртл хойрдгч девсң болхмн, терүнд орлцач болһн 72 часин алднд шүүвр өгх зөвтә болхмн. Түрүн девсңгин неквр күцәсн цергчнр мөрн сарин 28-әс авн хөн сарин 23 күртл комиссин гешүдлә харһад күүндхмн. Һурвн девсңгин ашар цуг даалһврмудыг күцәсн, шүүврән сәәнәр өгсн улс дундас ут тоодан 30 күн йилһҗ авгдхмн, дәкәд 15 орм ода цергә керг-үүлдврт орлцҗадг улст өггдхмн гиҗ зуралгдҗана.
«Баатрмуд 08» гидг төсв цергә керг-үүлдврт орлцачнр дунд ик тааслт олсна тускар Чумуда Николай темдглв. «Цергә керг-үүлдврин хөөн кесгнь таңһчиннь делгрлтд тусан күргх күслтә бәәнә, тегәд иим төсв эднд ик урмд өгв. Эн төсв кесг цергчд туста болҗ, шин эрдм дасч, зөвтә орман олҗ дамшлтан тустаһар олзлхд эрк биш туслх», - гиҗ Чумуда Николай келв.
Б.Б.Городовиковин нертә Хальмг ик сурһуль цергчнрт шин медрл зааҗ, немр эрдмтә болҗ төрскн һазр-уснаннь делгрлтд тәвцән орулхдан белн бәәнә гиҗ Салан Бадм темдглв. Эн төсвин ашар йилһҗ авгдсн улс шаңһа болн муниципальн залврин эрдм дасхмн. Сурһулин кем эн җилин һаха сард экләд, 2026 җилин зунар төгсхмн гиҗ зуралгдҗана. Сурһуль сурх улс лекцс соңссн деерән керг-төрин наадд-марһаст орлцхмн, шаңһа бүрдәцст дамшлт хоршахмн. Бадм Катиновичин келсәр, ик сурһулин көдләчнр белдсн көтлвриг РАНХиГС-ин шинҗләчнр хәләһәд, зәрм дуту-дундсин тускар селвгән өгв.
Тиигәд, эн җиләс авн мана орн-нутгт эклсн «Кадрмуд» гидг келн-улсин төсвин медлд цергә керг-үүлдврт орлцачнриг көдлмшәр тетклһнә, шин болн немр эрдм даслһна, эврә керг бүрдәлһнә туст дөң күрглһнә төрмүд хаһлгдҗана. «Агростартап» гидг көтлврт ода сольвр орулгдҗана, тегәд кесгнь мал асрад селәнә эдл-ахун халхар көдлҗ чадхмн.

ДООҖАН Наталья

Видео