Арвн негдгч Крымск хавриг темдгләд

20-03-2025, 11:05 | Общество, Таңһчин зәңгс, Зіњг

Урҗ өдр цуг орн-нутгт, нег үлү мана таңһчд, Крым Республик Әрәсән ханьд орсна арвн негдгч җилин өөнд нерәдсн керг-үүлдврмүд давулгдв. Элст балһсна Диилврин паркд «Мана Крымск хавр» нертә ирлцңгү митинг-концерт болв. Балһсна йосна, баһчудын болн олна бүрдәцсин элчнр, цергә шишлң керг-үүлдврин ветеранмуд, бәәрн улс терүнд орлцв.

Эн тууҗлгч йовдл орс келн-улсин авг-бәрциг хүврәҗ болшго гисиг цуг делкәд медүлсн болдг. Өдгә цагт болхла Крымин бәәрн улс эвин төлә төрскн нутган бас харсч йовна. Келхәс, Әрәсән орн-нутгла ханьцад, Крымин иргнмүдт әәмшг уга, сән таалд бәәдг арһ учрв.
Хурта өдр болв чигн әмтн олар цуглрв. Элст балһсна Хургин ахлачин дарук Бембин Евгений цуглрсн әмтиг байрин өдрлә йөрәһәд, керг-үүлдвриг секв. Энүнә келсәр, өвкнрин заясар ниицлт болн иньгллт мана үнтә зөөр болна. Ямр чигн цагт бидн цуһар хамцад нег-негндән дөң-тусан күргх зөвтәвидн. Хальмг Таңһчин болн Крым Республикин хоорнд кезәнәс авн тууҗлгч хәрлцән батлгдв гив.
– Арвн негн җил хооран Әрәсән тууҗд ончта йовдл учрв. Крым Республик хәрү мана орн-нутгин ханьд орв. Эндр тенд политикин, экономикин, социальн болн талдан халхар олн төрмүд хаһлгдҗ, регион делгрәд йовна, – гиҗ СВО-н ветеран, ЭГС-ин депутат Чумуда Николай темдглв.
Довдуна Нарн, Баджан Бадм, Арсена Николай, Мила Сенькина, Эрдньһәрән Амулң болн «Союз СВОих» нертә баг төрскнч седклтә дуд дуулҗ, олыг байрлулв. Керг-үүлдврт орлцачнр әмтәхн боорцгар болн улан зандн цәәһәр тоогдв.
Эн байрин өдрт нерәдсн керг-үүлдврмүд таңһчин райодар бас давулгдв. Сурһуль-эрдмин бүрдәцст ирлцңгү һәәхүлмүд болн марһас болв.
Хальмг Таңһчин Толһач Хаска Бату эн байрин өдрин тускар ниигмин сүлҗәнд бас ухан-тоолврарн хувалцв.
– Арвн негн җил хооран Крым Республикин болн Севастополь балһсна иргнмүд референдумин ашар Әрәсән ханьд орхар шиидв.
Тууҗла ирлцҗ хальмгуд Крымин келн-улсла хамдан кесг дәәнд орлцла. Өдгә цагт мана орн-нутгт бәәдг олн келн-улс хоорндан ахнр-дүүнр мет цуһар ниитәһәр бәәнә. Эндр цуһар олна Диилврин төлә кергән күцәҗ йовна. Тегәд иньгллт болн ниицлт мана ик күчн болна, – гиҗ Бату Сергеевич темдглв.

ОЛЬДАН Цаһан

Видео