Бичкн билгтнрин төлә – «Хальмгин алтн»

Хавр ирәд, нарна герлд тег ноһаһар бүркдәд, хальмг теегт бамб цецгүдин цаг эклнә. Бамб цецгүдин ик нәәрт белдәд, таңһчд олн керг-үүлдврмүд кегдҗәнә.

Дарани нег тиим керг-үүлдврин тускар «Калмыкия» таңһчин зәңгллһнә агентствд болсн брифингд сойлын көдләчнр келҗ өгв.
Бамб цецгүдин наадмин кемҗәнд келн-улсин сойлын өдрмүд болхмн. Терүнлә залһлдулад, «Хальмгин алтн» гидг таңһчин марһа бичкдүд болн уйн наста баһчуд дунд зарлҗахин тускар «Алтн» гидг ансамблин художественн һардач Наталья Нарин-Шаринова, Хальмг Таңһчин болн Ингушетин ачта артистк Ольга Бадрашкиева, бичкдүдин үүдәлтин бәәшңгин немр сурһулин багш Саглара Арлтанова седкүлчнрт келҗ өгв.
Биилдг, дуулдг, театральн үүлдврт орлцдг, урн һарин эрдмтә бичкдүдин болн уйн наста баһчудын коллективс Элстд болн таңһчд баһ биш. Цуг тедниг цуглулад байрин ик нәр кехәр сойлын үүлдәчнр зүткчәнә. Наталья Нарин-Шаринова һардҗадг «Алтн» нертә ансамблин ул деер эн керг-үүлдвр бүрдәгдҗәнә. Элст балһсна һардврин болн таңһчин сойлын болн зуульчллһна министерствин дөңгәр эн үүдәгч марһан бүрдәгдҗәнә. Бичкдүдин үүдәлтин бәәшңд тер марһан давхмн.
Марһана бүрдәмҗин комитетд орҗадг Ольга Бадрашкиеван келсәр, марһан түрүн болҗ кегдҗәнә. Таңһчин коллективсәс нань терүнд талдан һазрас, хам-хоша регионмудас бичкн билгтнр ирх гиҗ күләгдҗәнә. Бииһин, дууна, театрин эрдмин болн урн һарин эрдмин халхар бичкн билгтнр хоорндан дөрлдхмн. Марһана бүрдәмҗин комитетин хайгар орлцх саната коллективс эврәннь эрлһән йовулҗ чадҗана. Мөрн сарин 10 күртл эрлһән орулҗ болхмн.
- Иим сәәхн марһа бүрдәх санан кесгәс нааран орад бәәсмн, - гиҗ Саглара Арлтанова келнә. - Селән һазрин билгтә бичкдүдиг эн керг-үүлдврт орлцуллһн нег үлү чинртә гиҗ тоолҗанав. Талдан коллективсин билг-эрдмлә таньлдад, хамдан нег тәәз деер бииләд, дуулад, наадна тасрхас үзүләд, билгтә күүкд-көвүд эрдмән үзүлхмн. Шин үүрмүдлә таньлдад, медрлтә болн дамшлтта артистнрин болн багшнрин мастер-классмудт орлцхмн.
Наталья Нарин-Шаринован темдглсәр, «Хальмгин алтн» гисн нер марһанд өгснь бас учрта. Хамгин түрүнд мана иргч үй - билгтә бичкдүд мадндан йосн алтн болҗана. Алтн болсн гилвксн билг-эрдмәрн эдн наадмд ирсн әмтиг байрлулхмн.
Марһана гала-концерт Диилврин талвңд болхмн. Марһан мөрн сарин 24-әс авн 27 күртл давхмн. Марһана дииләчнр Гран-при мөрәһәр, лауреатнрин дипломсар ачлгдхмн. Марһана мөрә белдхләрн хальмгудын хамгин үнтә алтн болсн тоотыг олзлҗ янзлулх санатавидн, гиҗ Наталья Николаевна тоолврарн хувалцв.
Өдгә цага артистнрин болн үүдәгч үүлдәчнрин селгәнд ирх баһчудыг белдлһнд марһан йир туста болхмн. Келхәс, таңһчин билг-эрдмин кесг коллектив олн зүсн марһанд орлцад, дамшлт авсмн. Ода болхла, эдн эврәннь һазртан үүдәгч марһа кеҗ, үүрмүдән дуудҗана. Хальмг улсин билг-эрдмиг олн улст үзүлҗ, таңһчин нериг өөдән бәрх даалһвртаһан медҗ авхд күүкд-көвүдт эн марһан нилчән күргхнь маһд уга.

УШКАНА Сувсн