Тәрә тәрлһнә көдлмш угтҗ

Хальмг Таңһчин Толһач Хаска Батун даалһврар селәнә эдл-ахун министрин үүл дааҗадг Гаван Тимур Городовиковск районд хаврин тәрә тәрлһнә көдлмшин төрәр селвлцә давулв. «Россельхозцентр», «Калмыцкая» нертә САС, «Гидрометеорологин төв» бүрдәцсин элчнр, таңһчин МЧС-ин мергҗлтнр болн номтнр терүнд орлцв.

Удл уга таңһчин фермермүдин төлә тәрә тәрлһнә дааврта кем эклхмн. Эн җилд 66 миңһн шаху аһу гектар һазрт хаврин тәрә тәргдх болҗ зуралгдҗана. Селвлцәнә йовудт шаңһас йилһдг дем болн онц зөвтә кредитн мөңг өглһнә төрмүдт оньг тусхагдв. Терүнәс нань фитосанитарн болн түүмрәс саглуллһна керг-үүлдврмүдин тускар күүндвр бас болв.
– Тәрә тәрлһнә көдлмшиг таңһчин Толһач Хаска Бату бүрткҗәнә. Тосн-түләһәр болн талдан тоотар тетклһнд бас оньг тусхагдҗана. Агротехнологическ көдлмш цаг-болзгтнь күцәгдхин төлә цуг таал тогтах кергтә, – гиҗ Гаван Тимур темдглв.
Селвлцәнә чилгчәр Городовиковск района муниципальн бүрдәцин АПК-н әңгин һардач Александр Бондаренкод Әрәсән селәнә эдл-ахун Министерствин Күндллһнә һашг бәрүлҗ өггдв.
ОЛЬДАН Цаһан